आकाश भन्छन्, ‘महासंघको चलचित्र क्षेत्रलाई हेर्ने नजर राम्रो छ’



नेपाल उद्योग वाणिज्य महासंघको आसन्न निर्वाचनमा निर्देशक, निर्माता तथा कलाकार आकाश अधिकारीले केन्द्रिय सदस्यमा उम्मेदवारी दिने घोषणा गरेका छन् । उनले बरिष्ठ उपाध्यक्षका उम्मेदवार चन्द्रप्रकाश ढकालको प्यानलबाट उम्मेदवारी घोषणा गरेका हुन् । आउँदो मंसिर ११ र १२ गते महासंघको ५४औं वार्षिक साधारणसभा र नयाँ नेतृत्वका लागि निर्वाचन हुँदैछ ।

२०७३ सालको महासंघको निर्वाचनमा आकाश अधिकारी बस्तुगततर्फ केन्द्रिय सदस्यमा निर्वाचित भएका थिए । यसपटक पनि उनले चलचित्र क्षेत्रबाट प्रतिनिधित्व गर्दै बस्तुगततर्फ केन्द्रिय सदस्यमा उम्मेदवारी दिन लागेका हुन् । आफूले महासंघको चार वर्षे कार्यकालमा धेरै सिक्ने मौका पाएको र नेपाली चलचित्र इन्डस्ट्री र उद्योग-व्यवसायलाई मिलाउने ब्रिजको काम गरेको उनले बताए ।

बुधवार एक भेटमा उनले भने- ‘यसअघि चलचित्र क्षेत्र सेवामुलक उद्योग मात्र थियो । म उद्योग वाणिज्य महासंघमा निर्वाचित भएर गएपछि चलचित्र क्षेत्र र महासंघको साथले फिल्म क्षेत्र राष्ट्रिय मान्यता प्राप्त उद्योगमा आयो । तर जबसम्म नीति, नियम र कानुन लेखिँदैन तबसम्म चलचित्र क्षेत्रले त्यसको फाइदा लिन सक्दैन । यसैका लागि म फेरि महासंघ जान लागेको हुँ ।’

चलचित्र निर्माता संघका अध्यक्ष समेत रहेका उनले स्वदेशी उत्पादनलाई प्राथमिकता दिनका लागि पनि आफूले महासंघको केन्द्रिय सदस्यमा उम्मेदवारी घोषणा गरेको बताए । होटल, पर्यटन, कृषिमा पनि आफूले काम गर्ने उनी बताउँछन् । गएको चार वर्षे कार्यकालमा उद्योग वाणिज्य महासंघ र उद्योगी-व्यवसायीले चलचित्र क्षेत्रलाई हेर्ने नजर निकै राम्रो पाएको उनको अनुभव छ ।

नेपालमा बक्सअफिस कार्यान्वयन हुन सकेको खण्डमा उद्योगी-व्यवसायीहरु चलचित्र क्षेत्रमा लगानी गर्न इच्छुक रहेको पनि उनले बताए । ‘कला, संस्कृति, सभ्यतालाई बचाइराख्ने भनेको चलचित्र क्षेत्र हो । हिजो के थियो भनेर पछाडि फर्केर हेर्ने हो भने चलचित्र नै हो । त्यसैले चलचित्रले नै कला, संस्कृति र पहिचानलाई बचाइराख्छ । यसलाई उठाउनु पर्छ भन्नेमा सिंगो महासंघ छ ।’

उनले नेपाली चलचित्र अन्तर्राष्ट्रिय स्तरको बनाउन र अन्तर्राष्ट्रिय स्तरमा पुर्‍याउनका लागि पनि आफूले महासंघबाट पहल गर्ने प्रतिवद्धता व्यक्त गरे । महासंघको फिल्म एन्ड इन्टरटेन्मेन्ट फोरमका सभापति समेत रहेका निर्माता अधिकारी यसपटक पनि अत्याधिक मतका साथ विजयी हुनेमा विश्वस्त छन् । यसअघि ५६ भोट प्राप्त गर्दै उनी केन्द्रिय सदस्यमा विजयी भएका थिए ।

‘काठमाण्डू, पन्छी, क्रोध, कान्छी, के म तिम्रो होइन र ?, कोहिनूर’ लगायतका चलचित्र निर्देशन गरिसकेका उनले ‘काठमाण्डू, पन्छी, जनयुद्ध, क्रोध’ चलचित्रमा मुख्य भूमिकामा अभिनय समेत गरेका छन् । उनले पछिल्लो पटक चलचित्र ‘कान्छी’ निर्देशन गरेका थिए । आकाश रेड स्टुडियोका सञ्चालक समेत हुन् । उनी स्थिति सामान्य भएपछि नयाँ चलचित्र निर्माण गर्ने तयारीमा छन् ।

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Subrat Raj Acharya

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu