अपिल त्रिपाठी, पोखरा ।
पुर्व घोषीत रिलीज मितिको अन्तिम समयमा आएर बहुप्रतिक्षीत फिल्म ‘टलकजंग भर्सेस टुल्के’को मोफसल रिलीज मिति सरेको छ । उपत्यका बाहिर अब टुल्के एक साता पछी अर्थात कार्तीक २१ गते बाट प्रदर्शनमा आउने भएको छ । काठमाडौ उपत्यकामा भने टुल्के यही शुक्रबार बाट नै लाग्नेछ । हाल प्रदर्शनरत दुई नेपाली फिल्म लज्जा र स्टुपिड मनले राम्रो ब्यापार गरीरहेकोले मोफसल रिलीज स्थगन गरीएको निर्माण पक्षले जनाएको छ ।
टुल्केका निर्माता रबिन्द्र सिंह बानिया भन्छन– “लज्जा र स्टुपिड मनले राम्रो ब्यापार गरेकोमा हामी खुशी छौ, जुन भएपनि नेपाली फिल्मले राम्रो ब्यापार गर्नु हामी सबैको लागी राम्रो कुरा हो ।” निर्माता बानियाले लज्जा र स्टुपिड मन लाई थप सफलताको शुभकामना दिदै मोफसल रिलीज सारीएको बताएका छन ।
प्रतिष्पर्धासँग डराएको नभई चलीरहेका नेपाली फिल्मलाई थप सहज बनाउन आफुहरुले यो कदम उठाएको कलाकार समेत रहेका बानियाको भनाई छ । हिन्दी फिल्म ‘ह्याप्पी न्यु इयर’सँग भने आफुहरुको प्रतिष्पर्धा नभएको उनले दावी गरे ।
निश्चल बस्नेत निर्देशित फिल्ममा खगेन्द्र लामीछाने, दयाहाङ राई, रिचा शर्मा, शुशांक मैनाली, रबिन्द्र सिंह बानिया, प्रकाश घिमीरे लगायतका कलाकारको अभिनय रहेको छ ।