ठुलोपर्दा डटकम, काठमाण्डौ ।
‘सायद’ र ‘होस्टेल’ जस्ता हिट सिनेमा बनाएका निर्माता सुनिल रावलको तेश्रो प्रोजेक्ट ‘होस्टेल रिटर्न्स’को सोमवार शुभमुहूर्त गरिएको छ ।
दुर्गिश फिल्म्सको ब्यानरमा बन्ने यस चलचित्रको राजधानीस्थित कमलादीको गणेशथान मन्दिरमा शुभमुहूर्त गरिएको हो । चलचित्रका निर्माता रावल र निर्देशक सुरज भुषालले संयुक्त रुपमा ‘होस्टेल रिटर्न्स’ लेखिएको फोटोमा ‘क्ल्याप’ ठोकेर चलचित्रको शुभमुहूर्त गरेका थिए ।
शुभमुहूर्त गरेपछि बोल्दै चलचित्रका निर्माता रावलले यस चलचित्रलाई ‘सायद’ र ‘होस्टेल’ भन्दा हिट बनाउने आत्मविश्वास प्रकट गरे । ‘चलचित्रको कथावस्तु उत्कृष्ट छ र यसलाई राम्रो बनाउँछौ’, उनले भने । असोज २१ बाट बुटवलमा छायांकन गरिने यस चलचित्रमा सुशिल श्रेष्ठ, नजिर हुसेन, सुशिल सिटौला, अभय बराल, शशी श्रेष्ठ, स्वस्तीमा खड्का, निर्मल शर्मा, सुदाम सिके, प्रदीपकुमार चौधरी, इभास जोशी र रमेश श्रेष्ठ कलाकार रहेका छन् । नँया कलाकार डेब्यु गराएपनि चलचित्रलाई हिट बनाउन माहिर निर्माता रावलले यसमा पनि सबै नँयाकै प्रयो गरेका छन् । ‘नयाँ भएपनि सबै कलाकारलाई वर्कशप गराइरहेको छु’, निर्माता रावलले भने– ‘उनीहरुले राम्रो प्रस्तुती दिन्छन् भन्ने कुरामा म पुर्ण विश्वस्त छु ।’
शुभमुहुर्तमा चलचित्र राम्रो बनोस् भन्दै चलचित्र निर्देशक सुरजसुब्बा नाल्बो, चलचित्र प्राविधिक संघका अध्यक्ष मनोज केसी, चलचित्र पत्रकार संघका अध्यक्ष शान्ति प्रिय, कलाकार केशव भट्टराई, निर्मल शर्मा लगायतले शुभकामना मन्तब्य राखेका थिए ।
होस्टेलको जीवनशैली, मित्रता र प्रेमको कथा पेश गर्ने यस चलचित्रमामा स्याडोज ब्यान्डका गायक स्वप्नील शर्माको संगीत हुनेछ । चलचित्रमा चन्द्र पन्तको द्वन्द्व रहने छ ।