ठुलोपर्दा डटकम, काठमाण्डौ ।
नेपाली जनताको लागि नेताहरुले केही गर्न सकेनन भन्ने आवाज जताततैबाट उठ्ने गरेको छ । कलाकारहरु पनि यस्तै आवाजका गीत गाउँदै खुल्लामञ्चमा भेला भएका छन् । नेपाली लोक गीतसंगीतका १० जना सफल गायक-गायिकाहरु पशुपति शर्मा, पुरुषोत्तम न्यौपाने, बद्रि पंगेनी, रामजी खाँड, कुलेन्द्र बि.क., खुमन अधिकारी, पुस्कल शर्मा, प्रकाश सपुत बि.क. तथा जुना श्रीस मगर र शान्ति श्री परियार खुलामञ्चमा देखिएका हुन् ।
उनिहरु कुनै राजनीतिक कार्यक्रमको लागि नभई माथी उल्लेखित गायक-गायिकाले संयुक्त गाएको गीत ‘खोइ हाम्रो दिलमा त घामै लाएन’को शुटिंगको लागि उनिहरु जम्मा भएका हुन् । उक्त गीतलाई विगत एक दशक देखि गीतसंगीतमा कलम चलाउदै आएका गीतकार तथा संगीतकार शिब सुवेदीले तयार पारेका हुन् ।
सँधै माया प्रितिका गीत गाउनु भन्दा देशको अबस्थाको बारेमा चेतना जगाउने र गलत सँस्कारलाई खबरदारी गर्ने गीत गाउँदा भिन्नै प्रकारको आनन्द आउने गायक पशुपति शर्माले बताए । जनताका गायकको रुपमा आफ्नो छुट्टै परिचय बनाइसकेका गायक बद्रि पंगेनीले पनि यो गीतले साँच्चिकै जनताको आवाज बोलेको बताए ।
प्रकाश भट्टको निर्देशनमा तयार भएको म्युजिक भिडियो अब केही दिनमा पुष्पान्जली म्युजिक मार्फत बजारमा आउँदै छ ।
