फेसबुक टाइमलाइनमा पिडा बुझ्ने फुल खोज्दै भरत

ठुलोपर्दा डटकम, काठमाण्डौ ।
लामो समयको अन्तरालपछि गायक भरत सिटौला संगीतप्रेमीमाझ झुल्किँदैछन् । हरे राम, म अनि तिमी, रिया, कि त माया, चाहे पनि, कि जिन्दगी, कहिले आगो कहिले पानी, आकाश हेर्छु, प्रदेशमा जस्ता लोकप्रिय गीत गाएका सिटौला फेसबुक टाइमलाईन मार्फत चर्चामा आउने कोशिस गर्दैछन् ।

भरतले गाएको गीत ‘कुन फुल होला …’ बोलको गीतलाई निर्देशक जीवन थापाले नयाँ जीवन दिलाएका छन् । हरियो पर्दा लगाईएको एकै कोठामा छायांकन गरी तयार उक्त भिडियोमा भरतको फेसबुक टाइमलाइन देख्न पाईनेछ । छिट्टै रिलिजको क्रममा रहेको उक्त भिडियो अरुभन्दा बिल्कुल फरक बनेको निर्देशक थापाले ठुलोपर्दा डटकमलाई बताए । भिडियोमा पूर्णरुपमा ग्राफिक्स प्रयोग गरिएको छ ।

उक्त गीतमा संगीत पनि भरतको नै रहेको छ भने शब्द डा. बद्रि पोखरेलका रहेका छन् । भिडियोलाई मल्टी मेट नेटवर्कले तयार पारेको हो । भिडियोमा भरत आँफै देखिनेछन् । उनको अपोजिटमा निलुले अभिनय गरेकी छिन् ।