काठमाडौं – जुम्लाको दुर्गम भेगमा चलिरहेको चलचित्र ‘कल्ली’को छायाङ्कनबाट अभिनेता अर्पण थापाको रहस्यमय लुक्स सार्वजनिक गरिएको छ । निर्माण टोलीका अनुसार, अर्पणको यो लुक्स चलचित्रको कथाको महत्त्वपूर्ण हिस्सा हो । तर, उनको भूमिकाबारे अहिले केही पनि खुलासा गरिएको छैन ।
निर्देशक लक्ष्मण सुनारले अर्पणलाई यसअघि दर्शकले नदेखेको भूमिकामा प्रस्तुत गरेको बताएका छन् । किरण नेपाली, हिमाल कडरिया र अमलादेवी राईले संयुक्त रूपमा निर्माण गरिरहेको यो चलचित्रमा सौगात मल्ल, बेनिशा हमाल, नाजिर हुसेन, वर्षा राउत लगायतका कलाकारहरूको पनि अभिनय रहेको छ ।
महेश दवाडीले लेखेको चलचित्रलाई निसाल पौडेलले क्यामेरामा कैद गरेका छन् । प्रदर्शन मिति भने अझै सार्वजनिक गरिएको छैन ।