काठमाडौं – नेपाली चलचित्र ‘अभिमन्यु’ को निर्माण आज कीर्तिपुरमा एक विशेष पूजा समारोहका बिच सुरु भएको छ । चलचित्रको शुभ मुहूर्तसँगै छायाङ्कन पनि सुरु भएको छ । शुभ मुहूर्त कार्यक्रममा चलचित्रका प्रमुख कलाकार गौमाया गुरुङ, सरिता गिरी, लक्ष्मी बर्देबा, शिशिर वाङ्देल, किरण श्रेष्ठलगायतका कलाकारहरूको उपस्थिति रहेको थियो ।
चलचित्रका निर्माता विनोद पौडेलले ‘अभिमन्यु’ का लागि पात्र अनुसार बलियो कलाकारहरूको छनोट गरिएको बताएका छन् । यसअघि ब्लकबस्टर चलचित्र ‘पूर्ण बहादुरको सारङ्गी’ निर्माण गरेका पौडेलले ‘अभिमन्यु’ आगामी भदौ २७ गते दर्शकमाझ प्रदर्शनमा आउने जानकारी दिए ।
चलचित्रको थिम पोस्टरले दर्शकमा उत्साह जगाएको छ। पोस्टरमा चक्रव्यूह र पैसाबिचको द्वन्द्वलाई प्रस्तुत गरिएको छ । यो चलचित्र पैसाको प्रलोभनमा फसेका एक व्यक्तिको चक्रव्यूहबाट बाहिर निस्कने सङ्घर्षको कथामा आधारित रहेको बताइएको छ ।
सेभेन सिज सिनेमाको प्रस्तुतिमा निर्माण हुने ‘अभिमन्यु’ लाई सुशान्त गौतमले निर्देशन गर्नेछन् । यो चलचित्र सुशान्तको निर्देशनमा डेब्यु चलचित्र हो ।
मुकेश खनालले लेखेको चलचित्रको क्रिएटिभ निर्देशक मदन थापा हुन्, जसले यसअघि ‘बाटो : रोड टु डेथ’ निर्देशन गरेका थिए । विनोद पौडेल र गुञ्जन गिरीले निर्माण गरेको यो चलचित्रमा रमेश चौलागाई र हरि श्रेष्ठ सह–निर्माता रहेका छन् । ‘अभिमन्यु’को छायाङ्कन शरद महतोले गर्नेछन्।
चलचित्रलाई विश्वभर एकसाथ नेपाली र हिन्दी भाषामा प्रदर्शन गरिने निर्माण पक्षले जानकारी दिएको छ ।