काठमाडौं – सञ्चार तथा सूचना प्रविधि मन्त्रालयले चलचित्र विकास बोर्डको सदस्यमा नियुक्त गरेका सन्तोष बाबु लोहनीलाई चलचित्र विकास बोर्डले स्वागत गरेको छ । आइतबार बोर्डमा आयोजित एक कार्यक्रममा लोहनीको स्वागत र सदस्य राजु खत्रीको बिदाइ गरिएको छ । खत्रीको कार्यकाल चैत्र १८ गतेसम्म भए पनि सार्वजनिक बिदा परेकाले उनलाई आइतबार बिदाइ गरिएको हो।
चलचित्र विकास बोर्डको ७४५औँ बैठकले लोहनीलाई प्रवक्तामा समेत नियुक्त गरेको छ । साथै, उनलाई बक्स अफिस कार्यान्वयन, अन्तर्राष्ट्रिय चलचित्र प्रवर्द्धन, आर्थिक सहायता सिफारिस र मोफसल चलचित्र मूल्याङ्कन समितिको संयोजकको जिम्मेवारी पनि दिइएको छ ।
लोहनी नेपाली चलचित्र क्षेत्रमा परिचित नाम हो । उनले निर्देशन, अभिनय र निर्माण क्षेत्रमा सक्रिय भूमिका निर्वाह गरेका छन् । ‘अपमान’ चलचित्रबाट आफ्नो यात्रा सुरु गरेका लोहनीले ‘नारी, द वुमन’ र ‘शुभ लभ’ जस्ता चलचित्र निर्देशन गरेका छन् । ‘जय विजय’ जस्ता चलचित्रमा मुख्य भूमिका निर्वाह गरेका लोहनीले ‘सतरङ्गी’ र ‘हेलो नेपाल’ जस्ता टेलिभिजन कार्यक्रम पनि बनाएका छन् ।
बोर्डमा अन्य दुई सदस्य नियुक्त हुन बाँकी छन् ।