
काठमाडौं – दर्शकहरूले प्रतीक्षा गरिरहेको चलचित्र ‘कर्मा’का लागि दुई चर्चित गायकले गीत गाएपछि चलचित्रको चर्चा थप चुलिएको छ । हालै गायक दुर्गेश थापाले ‘कर्मा’का लागि एउटा गीत रेकर्ड गरेका छन्, जसको भिडियो छायाङ्कन समेत भइसकेको छ ।
दुर्गेशको गीतमा चलचित्रका मुख्य कलाकार विपिन कार्की, उपासनासिंह ठकुरी, मुकुन भुसाललगायतले अभिनय गरेका छन् । यो गीत केही दिनमै सार्वजनिक हुने निर्माण पक्षले जनाएको छ ।
यसै गरी, युवा पुस्तामाझ लोकप्रिय गायक सुशान्त केसीले पनि ‘कर्मा’का लागि ‘पागल पागल जस्तै’ बोलको गीत गाएका छन् । यस गीतमा उनकै शब्द, सङ्गीत र स्वर रहेको छ । सुशान्तले ‘कर्मा’मार्फत पार्श्व गायनमा डेब्यु गरेका हुन् । सुशान्तको गीतको भिडियो पनि तयार भइसकेको छ ।
सौरभ चौधरीको लेखन तथा निर्देशन रहेको चलचित्र ‘कर्मा’ नयाँ वर्ष २०८२ को छेको पारेर चैत २९ गते नेपाल र विदेशमा एकसाथ रिलिज हुँदैछ ।
एक्सन जनरामा निर्माण भएको ‘कर्मा’मा विपिन र उपासनासँगै मुकुन भुसाल, दिव्य देव, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय छ । ‘कर्मा’को कथा निर्देशक चौधरी आफैँले लेखेका हुन् ।