काठमाडौं – चैत्र २२ गते देशव्यापी प्रदर्शनको तयारीमा रहेको चलचित्र ‘वसन्त’ को नयाँ गीत ‘हेर्दै आँखामा’ सार्वजनिक भएको छ ।
नेपालका रमणीय स्थानहरूका साथै भारतको गोवामा छायाङ्कन गरिएको गीतमा प्रकाश सपुत र अभिनेत्री स्वस्तिमा खड्का रोमान्टिक अवतारमा प्रस्तुत भएका छन् । सार्वजनिक गीतमा चलचित्रका मुख्य पात्र वसन्तले विभिन्न धर्म र संस्कार अनुसार विवाह गरेको देखाइएको छ, जसले चलचित्रको कथा र मर्मलाई चित्रण गरेको छ ।
गीतमा सुगम पोखरेल र समीक्षा अधिकारीको स्वर रहेको छ भने प्रकाश सपुतको शब्द र सङ्गीत रहेको छ । योगेश काजी शाहले गीतलाई सङ्गीत संयोजन गरेका हुन् भने सुशन प्रजापतिले छायाङ्कन र केबीका खत्रीले कोरियोग्राफी गरेका हुन् । प्रवीन भट्टले गीतको सम्पादन गरेका छन् ।
निर्देशक तथा अभिनेता प्रकाश सपुतले गीतले मानिस जुनसुकै जात, धर्म अनि वर्गको भए पनि एक नै भएको सन्देश दिने बताए । चलचित्रको कथाले विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने सङ्घर्षको कथालाई प्रस्तुत गर्दछ ।
‘वसन्त’ मा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे, खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारी लगायतका कलाकारहरूको अभिनय रहेको छ । गलबन्दी प्रोडक्सनको प्रस्तुति रहेको चलचित्रको कथा, पटकथा र सङ्गीत पनि निर्देशक सपुतले नै तयार पारेका हुन् । मोहन विश्वकर्मा र बिन्दु बोहरा निर्माता रहेको चलचित्रको कार्यकारी निर्मातामा अनुरोध भट्टराई, नाना थकाली र वीरेन्द्र नारायण श्रेष्ठ रहेका छन् ।
भिडियो: