काठमाडौं – नेपाली लोक पप सङ्गीतको एक चर्चित नाम ‘कन्दरा’ पहिलो पटक इलाममा प्रस्तुति दिन तयारीमा छ । ग्याल्पो ल्होछारको अवसर पारेर शुक्रवार सूर्योदय नगरपालिका-१२ स्थित करफोक खेलमैदानमा आयोजना हुन लागेको कन्सर्टमा कन्दराले आफ्नो लोकप्रिय गीतहरू प्रस्तुत गर्नेछ ।
सूर्योदय होटेल व्यवसायी सङ्घको आयोजना तथा करफोक युवा परिवारको सह आयोजनामा हुन लागेको यो कन्सर्ट स्थानीय पर्यटन प्रवर्द्धनको उद्देश्यले आयोजना गरिएको हो । सङ्घका अध्यक्ष प्रज्वल प्रधानका अनुसार कन्दरा हाल ‘पहिला घरदेश अनि परदेश’ अभियान अन्तर्गत विश्व भ्रमणमा रहेको छ, जसले इलामको सांस्कृतिक तथा पर्यटकीय पहिचानलाई अझ उजागर गर्ने विश्वास गरिएको छ ।
ब्यान्डका प्रमुख गायक विवेक श्रेष्ठले ३२ वर्षको साङ्गीतिक यात्रामा पहिलो पटक इलाममा प्रस्तुति दिन पाउँदा उत्साहित भएको बताए । ‘यो इलामको ऐतिहासिक स्थलमा यस्ता कन्सर्टहरू कम मात्र भएका छन्, त्यसैले हामीलाई यो विशेष लागिरहेको छ । भारतको सिक्किम र दार्जिलिङबाट समेत दर्शक आउन लागेकाले कार्यक्रम झन् महत्त्वपूर्ण हुनेछ,’ उनले भने ।
श्रेष्ठले करफोकलाई भविष्यमा कन्सर्ट हबको रूपमा विकसित गर्न सकिने सम्भावना रहेको पनि बताए । ‘यो स्थान पोखरा वा काठमाडौं जत्तिकै साङ्गीतिक गतिविधिका लागि उपयुक्त हुन सक्छ । कन्दराको यो कन्सर्टले यहाँको आन्तरिक पर्यटन प्रवर्द्धनमा टेवा पुर्याउनेछ,’ उनले थपे ।
हाल ‘पहिला घरदेश अनि परदेश’ अभियानसहित विभिन्न देशहरूमा प्रस्तुति दिइरहेको कन्दराले बेलायतबाट आफ्नो अन्तर्राष्ट्रिय यात्रा थालेको थियो । हालै कतार, युएई, हङकङमा सफल कन्सर्टपछि ब्यान्डले आगामी मार्चदेखि अप्रिलसम्म अस्ट्रेलियाका आठ सहरमा प्रस्तुति दिने योजना बनाएको छ । होबर्ट (मार्च ८), मेलबर्न (मार्च १५), क्यानबेरा (मार्च २२) र एडिलेड (अप्रिल १२) मा कन्सर्ट तय भइसकेका छन् । सोही अवधिमा ब्यान्ड न्यूजिल्याण्डमा समेत गुन्जिनेछ ।
हाल कन्दराको टोलीमा भोकलमा विवेक श्रेष्ठ, ड्रम्समा सुनिल थापा, लिड गिटारमा देव लामा, बास गिटारमा पङ्कज झा, मादलमा अविनाश गायक र किबोर्डमा उमेश थापा रहेका छन् ।