काठमाडौं – चलचित्र निर्माता समेत रहेका गीतकार अविरल थापाले नयाँ म्युजिक भिडियो सार्वजनिक गरेका छन् । ‘ठक्कर’ शीर्षकको यस गीतमा पोखराका चर्चित गायक विनोद बानियाँको स्वर तथा सङ्गीत रहेको छ । यसको म्युजिक भिडियोमा नेपाली चलचित्र उद्योगका लोकप्रिय कलाकार राजबल्लभ कोइराला, सीतादेवी तिमिल्सिना लगायतका कलाकारको अभिनय देख्न सकिन्छ, जसलाई सिद्धार्थ पुडासैनीले निर्देशन गरेका छन् ।
अविरल चर्चित चलचित्र ‘बुलबुल’का निर्माता हुन् भने उनको नयाँ चलचित्र ‘भूठान’ आगामी वर्षको वैशाख १२ गते प्रदर्शन हुँदैछ । ‘ठक्कर’का निर्देशक पुडासैनीले हालै मात्र समीक्षात्मक रूपमा सफलता पाएको चलचित्र ‘सानो संसार’ निर्देशन गरेका थिए ।
अभिनेता कोइराला नेपालमा रहँदा ‘एक्टर: टेक वन’ चलचित्रको प्रदर्शनका क्रममा यो म्युजिक भिडियोको छायाङ्कन गरिएको थियो । गायक विनोद बानियाँ, गीतकार तथा निर्माता अविरल थापा र अभिनेता राजबल्लभ कोइराला पुराना साथीहरू हुन्, जसले सँगै काम गर्ने अवसर यस गीतमार्फत पाएका छन् ।
गीतकार थापाका अनुसार समाजमा बढ्दो निराशा, अवसाद, हिंसा, हत्या तथा आत्महत्यालाई निरुत्साहित गर्दै आशा र हौसला प्रदान गर्न यो गीत तयार पारिएको हो । गीत सङ्गीतको माध्यमबाट सकारात्मक सन्देश फैलाउने उद्देश्यका साथ उनले यस गीतलाई लेखेका र निर्माण गरेको बताए ।
अविरलले यसअघि पनि ‘साँघुरो’ चलचित्रको लागि ‘आउँदैछु कि जाँदैछु’, शिशिर योगीको स्वरमा ‘आफ्नै देशमा बस साथी’, प्रमोद खरेलको स्वरमा ‘यो झरीमा तिमीसँगै’, युनिटी ब्यान्डको ‘आशा अझै मरेको छैन’ जस्ता चर्चित गीतहरू रचना गरेका छन् ।
मानसिक स्वास्थ्यप्रति जनचेतना अभिवृद्धि गर्ने उद्देश्यले थालिएको यो अभियानमा काठमाडौं महानगरपालिका र स्वास्थ्य मन्त्रालयले पनि साथ दिएको छ । गीतकार थापाले आम जनमानससम्म गीत पुर्याउन तथा सामाजिक सञ्जालमार्फत प्रवाह गर्न सबै व्यक्ति, संस्थाहरू तथा सञ्चार माध्यमलाई सहयोग गरिदिन अपिल गरेका छन् ।
गीत: