काठमाडौं – यही चैत्र २३ गते ललितपुरको च्यासल मैदानमा ‘पाटन फेस्ट २०२५’ को आयोजना हुने भएको छ । नेपाल रोयल मल्टिप्रपोज प्रा.लि.को एकल आयोजनामा हुन लागेको यो फेस्टिभलले ललितपुरको सङ्गीत र पर्यटनलाई नयाँ उचाइ दिने अपेक्षा गरिएको छ । युवापुस्तामाझ लोकप्रिय ४ वटा चर्चित ब्यान्डहरूको प्रस्तुति रहने यो फेस्टको तयारी तीव्र पारिएको छ ।
फेस्टमा प्रस्तुति दिने चार ब्यान्डमध्ये पहिलो ब्यान्डको नाम सार्वजनिक गरिएको छ । युवाहरूमाझ निकै लोकप्रिय ‘जोन एन्ड द लोकल्स’ ब्यान्डले आफ्नो प्रस्तुति दिने पक्का भएको छ । गायक जोन चाम्लिङ राईको ‘हावा जस्तै’, ‘के गरौँ’, ‘निहिती’ जस्ता चर्चित गीतहरूले दर्शकलाई मनोरञ्जन दिनेछन् । बाँकी तीन ब्यान्डहरूको नाम पनि केही दिनमा सार्वजनिक गरिने आयोजकले जनाएको छ ।
फेस्टमा प्रवेशका लागि दर्शकले ६ सय, एक हजार र १२ सय रुपैयाँका टिकटहरू खरिद गर्न सक्नेछन् । विशेष टेबल बुकिङका लागि ३० हजारदेखि ६० हजार रुपैयाँसम्मका टिकटहरू उपलब्ध हुनेछन् । खल्ती एपमार्फत दर्शकहरूले सजिलै टिकट खरिद गर्न सक्नेछन् ।
कार्यक्रममा सहभागी हुने दर्शकहरूका लागि विभिन्न स्वादका खानेकुराहरू उपलब्ध गराउन २० वटा स्टलहरू राखिनेछन् । आधुनिक प्रविधिबाट तयार पारिएको साउन्ड सिस्टमले दर्शकहरूलाई उत्कृष्ट साङ्गीतिक अनुभव दिने आयोजकको दाबी छ ।
यो फेस्टले पाटनको स्थानीय पर्यटनलाई प्रवर्द्धन गर्ने विश्वास आयोजकले लिएको छ । च्यासल मैदानमा ८ देखि १० हजार दर्शकको उपस्थिति रहने अनुमान गरिएको छ । ‘पाटन फेस्ट २०२५’ ले ललितपुरको साङ्गीतिक माहौललाई नयाँ आयाम दिने अपेक्षा गरिएको छ ।