काठमाडौं – पाटन उच्च अदालतले फागुन १४ गते रिलिजको तयारीमा रहेको नेपाली चलचित्र ‘लाज शरणम्’ को प्रचारप्रसारमा रोक लगाएपछि यसको प्रचारात्मक सामग्री समेटिएको लोकप्रिय हास्य टेलिसिरियल ‘सक्किगोनि’को ९१औँ भाग प्रसारण स्थगित गरिएको छ ।
‘सक्किगोनि’ परिवारले एक सार्वजनिक सूचना जारी गर्दै अदालतको आदेशलाई सम्मान गर्दै उक्त भाग प्रसारण गर्न असमर्थ भएको जानकारी दिएको छ । साथै, यसले दर्शकहरूमा पर्न गएको असुविधाप्रति क्षमाप्रार्थी रहेको उल्लेख गरेको छ ।
पूर्व मन्त्री मोहम्मद अफताव आलमले आफ्नो अनुहारसँग मिल्ने गरी चलचित्रमा पात्र प्रस्तुत गरिएको भन्दै पाटन उच्च अदालतमा रिट निवेदन दायर गरेका थिए । न्यायाधीशद्वय लालबहादुर कुँवर र हेमन्त रावलको संयुक्त इजलासले सेन्सर बोर्डबाट अनुमति नपाउँदासम्म चलचित्रको कुनै पनि प्रचारप्रसार नगर्न आदेश दिएको थियो ।
‘लाज शरणम्’ को प्रचारप्रसारमा रोक लगाइएपछि, यससँग सम्बन्धित अन्य कार्यक्रमहरूमा पनि असर परेको हो । ‘सक्किगोनि’ को ९१औँ भाग प्रसारण स्थगित हुनु त्यसको एक उदाहरण हो ।