काठमाडौं – ‘मिस्टर एन्ड मिस नेसनल नेपाल २०२५’ को अडिसन शनिवार काठमाडौंस्थित होटेल मण्डला नर्लिङमा सुरु भएको छ ।
अडिसनको पहिलो दिन मिस ग्लोब डायना मोरेनोले निर्णायकको भूमिका निर्वाह गरेकी थिइन् । उनको साथमा फ्रेन्की बोजो, सन्तोष उपाध्याय, पूर्व मिस ग्लोब नेपाल रोशनी चन्द्र र पूर्व मिस्टर इन्टरनेशनल मानस राई पनि जजको रूपमा थिए ।
अडिसन सुरु हुनुअघि आयोजित पत्रकार सम्मेलनमा प्रतियोगिता र अडिसनबारे जानकारी दिइएको थियो ।
फागुन ३ गते काठमाडौंबाट सुरु भएको अडिसन देशभरिका सातै प्रदेशमा हुनेछ । उपत्यकाबाहिर झापा, इटहरी, वीरगन्ज, चितवन, पोखरा, बुटवल, नेपालगन्ज र धनगढीमा फागुन १२ गतेदेखि अडिसन हुनेछ । जसको तालिका केही दिनमा सार्वजनिक गरिने आयोजकले जनाएको छ ।
प्रतियोगितामा १८ देखि ३२ वर्ष उमेरका महिला र १८ देखि ३४ वर्ष उमेरका पुरुषले अडिसन दिन पाउनेछन् ।
मिस्टर एन्ड मिस नेसनल नेपालको यो चौथो संस्करण हो । यस पटक अन्तर्राष्ट्रिय विजेताहरूलाई अडिसनमै निर्णायकको रूपमा ल्याउन सफल भएको आयोजक सनुर्वी इन्टरनेशनलका सञ्चालक डा. सन्तोष उपाध्यायले बताए ।
यस प्रतियोगिताले वर्ल्ड युथ फेस्टिभलसँग सहकार्य गर्दै काभ्रेपलान्चोकमा अन्तर्राष्ट्रिय स्तरको फेसन रनवे सो पनि गर्दै छ, जुन जलवायु परिवर्तनसम्बन्धी जनचेतनाका लागि हुनेछ ।
मिस्टर एन्ड मिस नेशनलभित्र ६ वटा अन्तर्राष्ट्रिय फ्रेन्चाइज छन् । मिस सुप्रा नेसनल, मिस ग्लोब नेपाल, मिस्टर सुप्रा नेसनल, मिस इन्टरकन्टिनेन्टल, मिस्टर इन्टरनेशनल र मिस्टर टुरिजम वर्ल्डजस्ता प्रतियोगिताहरू मिस्टर एन्ड मिस नेशनल नेपालकै छातामुनि हुने आयोजकले जनाएको छ ।