काठमाडौं – समाजमा व्याप्त बालविवाह र महिला हिंसाको ज्वलन्त चित्रण गर्ने दाबी गरिएको नेपाली चलचित्र ‘जुनाः एक व्यथा’ को ट्रेलर सार्वजनिक भएको छ । यही माघ २५ गते रिलिज हुने यस चलचित्रले बालविवाहका कारण एक बालिकाको जीवनमा आइपर्ने पीडा र सङ्घर्षलाई मार्मिक ढङ्गले प्रस्तुत गरेको छ ।
गोदावरी फिल्म प्रोडक्सन एन्ड रिसर्च प्रालिको ब्यानरमा निर्माण भएको यस चलचित्रमा बालिकाको भूमिकामा अभिनेत्री अस्मिता ढकालले उत्कृष्ट अभिनय गरेकी छिन् । ट्रेलरमा उनको विवाहदेखि गर्भावस्थासम्मको पीडादायी यात्रा देखाइएको छ । बालविवाह पछि आउने सामाजिक कुप्रथा र महिला हिंसाका विभिन्न आयामहरूलाई यस चलचित्रले उजागर गरेको बताइएको छ ।
चलचित्रका निर्माता दीपकप्रसाद घिमिरेले यस चलचित्रले दर्शकको मन छुने विश्वास व्यक्त गरेका छन् । निर्देशक जीवन सेन्चुरीले यस चलचित्रले महिला हिंसा, बालविवाह, अनमेल विवाह, बहुविवाह, बलात्कार र छाउपडी प्रथा जस्ता कुप्रथाहरूको अन्त्यका लागि जनचेतना फैलाउने बताएका छन् ।
चलचित्रमा अस्मिता ढकाल, कृष्णप्रसाद धिताल, देशभक्त खनाल, रश्मि भट्ट, कमल बोहरा, अस्मिता बस्नेत र खगेन्द्र न्यौपानेको अभिनय छ ।
ट्रेलर:
