काठमाडौं – नेपालमा मात्र ५० करोड र विश्वभर ७० करोड माथि व्यापार गरेको नेपाली चलचित्र ‘पूर्ण बहादुरको सारङ्गी’को दोस्रो भाग निर्माण हुने भएको छ । आइतबार आयोजित चलचित्रको सक्सेस पार्टीमा निर्माता विनोद पौडेलले ‘पूर्ण बहादुरको सारङ्गी २’ को निर्माणको औपचारिक घोषणा गरेका हुन् ।
कार्यक्रममा पौडेलले अर्को चलचित्र ‘रोल नं १’ पनि २०८२ सालमा रिलिज हुने जानकारी दिए । तर, ‘पूर्णबहादुरको सारङ्गी २’ को निर्देशक को हुने भन्ने बारेमा कुनै स्पष्ट पारेनन् ।
पहिलो भागका निर्देशक सरोज पौडेल कार्यक्रममा उपस्थित भए पनि सिक्वेल निर्देशन गर्ने जिम्मेवारी उनीमाथि आएको देखिएन । निर्देशक लुकाइदा ‘निर्माता पौडेल आफैँ निर्देशन गर्ने तयारीमा छन् कि’ भन्ने प्रश्न उब्जिएको छ ।
यसै गरी, ‘पूर्ण बहादुरको सारङ्गी २’ चलचित्रको लागि कलाकारहरूको बारेमा पनि कुनै औपचारिक घोषणा गरिएको छैन । यो चलचित्र २०८३ सालमा रिलिज गर्ने लक्ष्य राखिएको छ ।
आइतबार साँझ काठमाडौंमा चलचित्रकर्मीबीच ‘पूर्ण बहादुरको सारङ्गी’को सफलताको समारोह आयोजना गरिएको थियो ।
