काठमाडौं – कलरिस्टबाट निर्देशक बनेका जुनिम गहतराजको निर्देशनमा बनेको चलचित्र ‘तान्डवम्’को टिजर सार्वजनिक भएको छ । शुक्रवार सार्वजनिक गरिएको टिजरले चलचित्रको डार्क र थ्रिलिङ पक्षलाई उजागर गरेको छ ।
टिजरको सुरुवात मुख्य कलाकार अङ्कित खड्काको संवादबाट हुन्छ र अन्त्यमा रहेको निर्देशक जुनिमको ‘भगवान् पनि मै हुँ, राक्षस पनि मै हुँ’ भन्ने संवादले चलचित्रको कथावस्तुबारे थप जिज्ञासा उत्पन्न गराएको छ ।
चलचित्रले एक नव विवाहित जोडीको जीवनमा आइपर्ने अप्रत्याशित घटनाहरूलाई पारिवारिक तथा एक्सन थ्रिलर शैलीमा प्रस्तुत गर्दछ । जब उनीहरू आफ्नो पहिलो सन्तानको स्वागतको तयारी गरिरहेका हुन्छन्, त्यही बेला उनीहरूको जीवनमा आउने उतारचढावले कथामा रोमाञ्चक मोड ल्याउँछ ।
चलचित्रमा अङ्कित खड्का र जुनिम गहतराजसँगै पुष्कर गुरुङ, प्रेम सुब्बा, सरिना मगर, अनोज पाण्डे, कमल कार्की र गोपाल कटुवालको अभिनय रहेको छ । सिंहदेवी प्रोडक्सनले भिजुयल आर्ट्स स्टुडियोको सहकार्यमा निर्माण गरेको यस चलचित्रमा हरि घले लामाले छायाङ्कन गरेका छन् भने सम्राट बस्नेतले एक्सन निर्देशन गरेका छन् । सुशान्त गौतमको सङ्गीत र कोविद बज्रको ब्याकग्राउण्ड म्युजिकले चलचित्रलाई थप आकर्षक बनाएको छ ।
टिजर:
