काठमाडौं – चलचित्र ‘लाज शरणम्’को नयाँ पोस्टर सार्वजनिक भएको छ । यो पोस्टरसँगै दर्शकमा उत्सुकता बढेको छ । यसअघिका पोस्टरमा नदेखिएका कलाकार धुर्मुसको नामले परिचित ‘सिताराम कट्टेल’को नयाँ अवतारले यस चलचित्रलाई थप रोमाञ्चक बनाएको छ ।
पोस्टरमा धुर्मुसलाई पूर्व मन्त्री मोहम्मद आफतव आलमको भूमिकामा देखाइएको छ । उनी नेताको गेटअपमा दोरा सुरुवाल ज्वारीकोट लगाएर अभिवादन गरिरहेका छन् । पृष्ठभूमिमा कफिन बोकेका स्थानीयहरू देखिएका छन् जसले चलचित्रको कथावस्तु गम्भीर हुने संकेत गर्दछ ।
यो चलचित्र हास्य टेलिश्रृंखला ‘सक्किगोनि’को टिमले बनाएको हो । सक्किगोनि टिमका अधिकांश कलाकारहरू यसमा छन् । यसमा विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बु, अर्जुन घिमिरे, सागर लम्साल, हरिश निरौला, प्रियाना आचार्यलगायतका कलाकारहरूको अभिनय रहेको छ ।
कुमार कट्टेल ‘जिग्री ब्रो’ले निर्देशन गरेको यो फिल्मले समाजमा हुने अन्याय, अत्याचार र राजनीतिक खिचातानी जस्ता विषयलाई हास्य व्यङ्ग्य मार्फत उठान गर्ने बताइएको छ । चलचित्रले दर्शकलाई मनोरञ्जन दिने साथै समाजप्रतिको चेतना जगाउने अपेक्षा गरिएको छ ।
जेपिटी क्रियसनको ब्यानरमा निर्माण भएको यो चलचित्र फागुन १४ गते महाशिवरात्रिको अवसरमा प्रदर्शन हुनेछ ।
