भक्तपुर दरबार स्क्वाएरमा रोमान्टिक देखिए दया र आँचल

काठमाडौं – अभिनेता दयाहाङ राई र अभिनेत्री आँचल शर्माको प्रमुख अभिनय रहेको नेपाली चलचित्र ‘दुःखी आत्मा’को टिजर सार्वजनिक भएसँगै ‘सिन्धुलीको जुनार’ चर्चित छ । ‘एडल्ट’ संवाद र दृश्यमा समावेश यो शब्दावली साङ्केतिक रूपमा प्रयोग गरिएको थियो ।

यसैबीच, यस चलचित्रको नयाँ गीत छायाङ्कन गरिएको छ । यो रोमान्टिक गीतको हालै मात्र भक्तपुर दरबार स्क्वायरमा छायाङ्कन गरिएको हो । यो गीतको भिडियोमा पनि सुन्तला र जुनारको प्रयोगलाई निरन्तरता दिइएको छ ।

गीतमा केतन क्षेत्रीको सङ्गीत, ईश्वर कार्कीको शब्द तथा कम्पोज छ भने रामजी लामिछानेले कोरियोग्राफी गरेका छन् । केही दिनमै यो गीतको भिडियो सार्वजनिक गर्ने निर्माण पक्षको तयारी छ ।

चलचित्रको टिजर र ब्रेकअप कविता सामाजिक सञ्जालमा भाइरल भएपछि दर्शकको चासो  बढेको छ । फागुन २ गतेबाट रिलिज हुन लागेको यो चलचित्रलाई दीपेन्द्र लामाले लेखन तथा निर्देशन गरेका हुन् ।

आलोक शुक्लाको छायाङ्कन रहेको यो चलचित्र हिमाल कडरियाले निर्माण गरेका हुन् भने सुदिप ढकाल कार्यकारी निर्माता हुन् । यसमा अनुप विक्रम शाही, वुद्दि तामाङ लगायतका कलाकारहरूको पनि अभिनय छ ।