चलचित्र ‘दुखी आत्मा’को देशभर ‘जोक जात्रा’ भ्रमण हुने

काठमाडौं – आगामी फागुन २ गते रिलिज हुने चलचित्र ‘दुखी आत्मा’को प्रचारप्रसारलाई अझै प्रभावकारी बनाउन फिल्म निर्माण टिमले ‘जोक जात्रा’ नामक कमेडी शोको आयोजना गर्ने भएको छ ।

चलचित्रको टिजर र ‘ब्रेकअप कविता’ले दर्शकको मन जितिसकेको अवस्थामा यो कमेडी शोले दर्शकलाई थप उत्साहित बनाउने अपेक्षा गरिएको छ । यो शो माघ ६ गतेदेखि माघ २१ गतेसम्म देशका विभिन्न १० सहरमा आयोजना हुनेछ ।

यो कमेडी शो क्रमशः नेपालगन्ज, बुटवल, नवलपुर, चितवन, पोखरा, हेटौँडा, दमक, बिर्तामोड, इलाम र अन्तिममा काठमाडौँमा आयोजना हुनेछ ।  ‘कमेडी च्याम्पियन सिजन ३’ का विजेता सुनिल खड्का, कर्मा सिंह लामा, सन्देश देवकोटा, निश्चल अर्याल र प्रतीक कुमार अधिकारीले आफ्नो प्रस्तुति दिनेछन् । 

दीपेन्द्र लामाको निर्देशनमा बनेको यस चलचित्रमा दयाहाङ राई, आँचल शर्मा, अनुप विक्रम शाही, वुद्दि तामाङ लगायतका कलाकारहरूको अभिनय रहेको छ । हिमाल कडरियाले यस चलचित्रलाई निर्माण गरेका हुन् ।