काठमाडौं – गायक तथा अभिनेता प्रकाश सपुतले निर्देशन तथा अभिनय गरेको चलचित्र ‘वसन्त’को गीत ‘साँझ पर्यो झमक्क’ले युट्युबमा तहल्का मच्चाइरहेको छ । गत शनिवार सार्वजनिक भएको यो गीत युट्युब ट्रेन्डिङको शीर्ष स्थानमा उक्लिएको छ र हालसम्म २२ लाखभन्दा बढी दर्शकले हेरिसकेका छन् ।
यति मात्र होइन, गीतले ८७ हजारभन्दा बढी लाइक र हजारौँ प्रतिक्रिया पाएको छ । यो गीत म्युजिक सेक्सनमा मात्रै होइन, युट्युब ट्रेन्डिङको मुख्य सेक्सनमा पनि पाँचौँ स्थानमा रहेको छ जहाँ लामो समयदेखि सर्ट्स भिडियोको अधिपत्य थियो ।
दर्शकहरूले गीतको कमेन्ट बक्समा चलचित्र र गीतको प्रशंसा गर्दै लोकेसन, कोरियोग्राफी, गायन र मुख्य कलाकार प्रकाश सपुत तथा स्वस्तिमा खड्काको अभिनयको खुलेर प्रशंसा गरेका छन् । सपुतले नै शब्द रचना तथा सङ्गीत तयार पारेको यो गीतको अडियो र भिडियो दुवै पक्षलाई दर्शकले अब्बल ठहर्याएका छन् । गीतमा सपुतलाई चर्चित गायिका शान्तिश्री परियारले साथ दिएकी छन् ।
सपुतकै लेखन र निर्देशन रहेको ‘वसन्त’ एक सामाजिक ड्रामा हो जसले विपन्न विश्वकर्मा समुदायको छोराको लेखक बन्ने सपना र त्यसका लागि उसले गर्ने सङ्घर्षको कथा प्रस्तुत गर्दछ । यसमा स्वस्तिमा खड्का, प्रभात पाल ठकुरी, श्री शिभान्सी लगायतका कलाकारको पनि अभिनय रहेको छ ।
गलबन्दी प्रोडक्सनको ब्यानरमा बनेको यो चलचित्र चैत्र २२ गतेबाट देशभर प्रदर्शन हुनेछ ।
गीत: