काठमाडौं – फागुन १४ गते रिलिज हुने नेपाली चलचित्र ‘लाज शरणम्’ले दर्शक लक्षित ‘स्टार स्किम अवसर’को अफर सार्वजनिक गरेको छ । यो अफरमा सहभागीहरूले लोक पप सँगै आधुनिक गीत, कविता, र्याप, क्यारिकेचर र भाषण कलाका विधामध्ये एकमा बढीमा दुई मिनेटसम्मको भिडियो बनाएर इमेलमार्फत पठाउनुपर्ने बताइएको छ ।
प्रतियोगीहरूले तयार पारेका भिडियोहरू ‘लाज शरणम्’को आधिकारिक टिकटक अकाउन्टमा अपलोड गरिने र भ्यूज र सेयरको आधारमा उत्कृष्ट भिडियो छनोट गरी विजेतालाई आकर्षक पुरस्कार प्रदान गर्ने जनाएको छ । यो प्रतियोगितामा सहभागी हुन माघ १ गतेदेखि १५ गते राति १२ बजेसम्म सहभागीहरूले चलचित्र ‘लाज शरणम्’को इमेलमा पठाउन सक्नेछन् ।
‘लाज शरणम्’ले केही समयअघि तीन वटा पोस्टर सार्वजनिक गरेको थियो । यस चलचित्रको निर्देशन कुमार कट्टेल ‘जिग्री ब्रो’ले गरेका छन् भने विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बु, अर्जुन घिमिरे, सागर लम्साल, हरिस निरौला, प्रियाना आचार्यलगायतका कलाकारले अभिनय गरेका छन् । नवीन श्रेष्ठ निर्माता, राम नरेश शाह र सृजना खड्का सह–निर्माताको रूपमा रहेका छन् । सुदीप बरालले छायाङ्कन गरेका हुन् ।