काठमाडौं – महाशिवरात्रिको अवसर पारेर प्रदर्शन हुन लागेको नेपाली चलचित्र ‘फेरि रेशम फिलिली’को पहिलो गीत ‘ग्रिन कार्डैमा’ सार्वजनिक भएको छ । मङ्गलवार माघे सङ्क्रान्तिको दिन पारी सार्वजनिक गरिएको यो गीतमा चलचित्रका मुख्य कलाकार विनय श्रेष्ठ र सुपुष्पा भट्टलाई फिचर्ड गरिएको छ । दीपक शर्माको शब्द र सङ्गीत रहेको यस गीतलाई डेभिड शङ्करले आवाज दिएका छन् ।
यसअघि सन् २०१५ मा रिलिज भएको ‘रेशम फिलिली’को गीत ‘पारी त्यो डाँडा’ले दर्शकको मन जितेको थियो । निर्माण पक्षले ‘ग्रिन कार्डैमा’ले पनि त्यस्तै चर्चा पाउने अपेक्षा गरेको छ ।
निरोज महर्जनले लेखन र निर्देशन गरेको यो चलचित्रलाई रौनक विक्रम कँडेलले निर्माण गरेका हुन् । चलचित्रमा विनय श्रेष्ठ, सुपुष्पा भट्ट, नीर शाह, कामेश्वर चौरासिया, प्रकाश घिमिरे लगायतका कलाकारको अभिनय रहेको छ । यसअघिको ‘रेशम फिलिली’मा काम गरेका अधिकांश कलाकार र प्राविधिक यस चलचित्रमा पनि जोडिएका छन् ।
चलचित्रमा गीत सङ्गीतको प्रयोगलाई प्राथमिकता दिइएको छ । कालीप्रसाद बाँस्कोटा, एसडी योगी, हर्क साउद लगायतका सङ्गीतकारहरूले चलचित्रका लागि सङ्गीत दिएका छन् । चलचित्रको छायाङ्कन सुसन प्रजापतिले गरेका हुन् भने सम्पादन सुरेन्द्र पौडेलले गरेका हुन् ।
‘फेरि रेशम फिलिली’ले दर्शकमाझ पुरानो ‘रेशम फिलिली’को जस्तो प्रभाव पार्ने निर्माण टिमको विश्वास छ । चलचित्रलाई गोविन्द शाहीको काफिया फिल्मस् र कुवेर सिने डिष्ट्रीव्युसनले वितरण गर्दैछ ।
गीत: