‘महाराजधिराज’को पोस्टरमै दोहोरो भूमिकामा पल शाह

काठमाडौं – नयाँ नेपाली चलचित्र ‘महाराजधिराज’को फस्ट लुक पोस्टर सार्वजनिक गरिएको छ । छत्रेश्वरी म्यानेजमेन्ट प्रा.लि.को प्रस्तुति रहेको यस चलचित्रको फस्ट लुक साबिकका चलचित्रहरूको भन्दा अलग बनाइएको छ, जहाँ अभिनेता पल शाह फिचर्ड छन् ।

फस्ट लुक पोस्टरमा दुई भिन्न पात्रलाई देखाइएको छ । एक जना राजकीय पोसाकमा सजिएका छन् भने अर्का नग्न अवस्थामा । यो विरोधाभासले समाजका विभिन्न तहका मानिसहरूले भोगिरहेका समस्यालाई चित्रण गर्ने प्रयास गरेको देखिन्छ । चलचित्रको स्लोगन ‘अनेकौँ समस्या म देख्छु जगतमा, छ कि दोष हाम्रो आफ्नै रगतमा’ ले व्यक्ति स्वयंमा समस्याको जरा रहेको सङ्केत गर्दछ ।

परिच्छेद सेनको कथा र निर्देशनमा बनेको यस चलचित्रले दर्शकलाई भावनात्मक रूपमा छुने विश्वास गरिएको छ । यो चलचित्र दसैँको फूलपातीमा चलचित्र रिलिज गर्ने लक्ष्य लिएको छ । यसका प्रस्तुत कर्ता बिराज विष्ट हुन् भने निर्माताहरू टोपेन्द्र विष्ट, चक्रबहादुर केसी र रबी खड्का हुन् ।