‘पिताम्बर’को टिजर सार्वजनिक, ‘तुफान’ बने प्रदिप

काठमाडौं – चैत २९ गते रिलिज हुने कृषा चौलागाईं निर्देशित नेपाली चलचित्र ‘पिताम्बर’को टिजर सार्वजनिक गरिएको छ । सोमवार सार्वजनिक गरिएको एक्सन-थ्रिलर टिजरमा चलचित्रका प्रमुख पात्रहरूलाई स्थान दिइएको छ ।

यसमा अभिनेता प्रदिप खड्कालाई ‘तुफान’को रूपमा परिचय गराइएको छ भने दयाहाङ राईलाई प्रहरीको भूमिकामा राखिएको छ । टिजरमा दिव्य देव, सौगात मल्ल, अनुप विक्रम शाही, प्रमोद अग्रहरीलाई एन्टागोनिस्ट देखाइएको छ । अभिनेत्रीहरू सुरक्षा पन्त, दिव्या रायमाझी र सुपुष्पा भट्ट तथा कलाकारहरू रवीन्द्र झा र गौरव बिस्टलाई पनि अटाइएको छ ।

गत वर्ष चैत्रमा नवलपरासीको त्रिवेणी धाममा छायाङ्कन सुरु भएको चलचित्रको बजेट ५ करोड अनुमान गरिएको छ ।

यसअघि ‘ऐँचो पैँचो’ चलचित्र निर्देशन गरेकी कृषाले ‘पिताम्बर’लाई दर्शकले रुचाउने अपेक्षा गरेकी छन् । पुरुषोत्तम प्रधानले खिचेको फिल्मको लेखन प्रदीप भारद्वाजले गरेका हुन् भने हिमाल केसीले द्वन्द्व निर्देशन गरेका छन् ।

चलचित्रका निर्माता विशाल चौलागाईं हुन् भने सह निर्माता पुरुषोत्तम प्रधान र कार्यकारी निर्माता सुमन गौतम हुन् । यो चलचित्र आरआर फिल्म्सले वितरण गर्दैछ ।

टिजर: