काठमाडौं – चर्चित गायक तथा सङ्गीतकार राजनराज सिवाकोटीको नयाँ गीत ‘माया गर्न जान्यो मायाले’ ले सङ्गीत बजारमा चर्चा पाएको छ । राजनले आफ्नै युट्युब च्यानलमार्फत सार्वजनिक गरेको यो गीतमा शब्द, सङ्गीत र स्वर आफ्नै रहेको छ ।
गीतमा उनलाई डि क्याप्टेन वियोन्सेले स्वरमा साथ दिएकी छिन् । विगतमा ‘फुलबुट्टे सारी’ र ‘ल्यासे पाउँ’ जस्ता हिट गीतमा सँगै काम गरिसकेका राजनराज र वियोन्सेको यो जोडीलाई दर्शकले निकै रुचाएका छन् । केही वर्षको अन्तरालपछि सँगै आएका यी दुईको नयाँ गीतले विशेष गरी टिकटकमा निकै राम्रो प्रतिक्रिया पाएको छ ।
राजुजंग बस्नेतले निर्देशन गरेको यस गीतको भिडियोलाई अभेसमनी बज्राचार्यले खिचेका छन् । भिडियोमा राजनराज र वियोन्सेको रोमान्टिक जोडीलाई देख्न सकिन्छ ।
टिकटकमा उत्साहजनक प्रतिक्रिया पाएपछि राजनराजले यो गीतले युट्युबमा पनि सोहीअनुरूपको सफलता पाउने विश्वास व्यक्त गरेका छन् ।
भिडियो: