काठमाडौं – आगामी फागुन १४ गतेबाट रिलिज हुन लागेको नेपाली चलचित्र ‘मायावी’ले दर्शकलाई आकर्षित गर्न थालेको छ । निर्माण पक्षले सार्वजनिक गरेको नयाँ गीत र दुई वटा पोस्टरले फिल्मको कथावस्तुबारे थप चासो बढाएको छ ।
सार्वजनिक गरिएका पोस्टरमा मुख्य कलाकार पल शाह र दीपिका प्रसाईँलाई फरक-फरक भावमा देखाइएको छ । एउटा पोस्टरमा उनीहरू रोमान्टिक मुद्रामा देखिएका छन् भने अर्को पोस्टरमा पल शाह भावुक मुद्रामा देखिएका छन् । यी पोस्टरहरूले चलचित्रमा प्रेम र पीडाका भावना कति गहिरोसँग समेटिएका छन् भन्ने सङ्केत गर्दछ ।
दिवाकर भट्टराइको लेखन तथा निर्देशनमा बनेको यस चलचित्रमा धेरै प्रतिभाशाली कलाकारको अभिनय छ । पल शाह र दीपिका प्रसाईँका साथै सुशील सिटौला, करिश्मा श्रेष्ठ, नव-कलाकार समीम खान लगायतका कलाकारहरूको अभिनयले चलचित्रलाई झनै रोचक बनाएको छ ।
निर्माताहरू ध्रुव न्यौपाने, राज कटुवाल र चन्द्र पन्त हुन् भने सह–निर्माताको रूपमा राजु पराजुली र सुमित वली छन् । सङ्गीत शम्भुजित बास्कोटा र एसडी योगीले दिएका छन् भने कविराज गहतराज र प्रवीण सिंहले कोरियोग्राफी गरेका छन् ।