काठमाडौं – बालमनोविज्ञान, बालअधिकार र समाजमा विद्यमान असमानतालाई मार्मिक ढंगले चित्रण गरेको नेपाली चलचित्र ‘सारंग’को टिजर सार्वजनिक गरिएको छ । टिजरमा बाबुआमाको मतभेदले बच्चामा पर्ने असर, साथीभाइबीचको प्रेम र समर्पणको कथा सुन्दर ढंगले प्रस्तुत गरिएको छ । शहरिया जीवनशैली र आपसी सम्बन्धलाई पनि टिजरमा निकै सुन्दर तवरले उजागर गरिएको छ ।
माघ २५ गतेदेखि देशव्यापी प्रदर्शनमा आउने यो चलचित्र प्रशान्त तामाङले निर्देशन गरेका हुन् । यसमा ऋचा शर्मा, उत्पल झा, समीर मणि दीक्षित, सुरज तमु, मणि के राई, अनिशा न्यौपाने, निरज ब्ल्याक, बिश्व स्याङ्बो, दीपीका थापा, सुमन सागर जंग केसी, प्रभात श्रेष्ठ लगायतका कलाकारहरूले अभिनय गरेका छन् । बालकलाकार द्वय सम्राट थापा र आदित्य कार्कीको अभिनय पनि फिल्मको मुख्य आकर्षण हुने अनुमान गरिएको छ ।
दर्शन बुद्ध फिल्मस्को ब्यानरमा निर्माण भएको चलचित्रको निर्मातामा प्रेम तामाङ र फूलमाया तामाङ छन् । पुष्पा लिम्बू र बिनु गुरुङ सहनिर्माता रहेको फिल्मका गीतमा शंकर थापा ‘स्माइल’ र नकुल कार्कीको संगीत, डिपी खनालको गीत र सुष्मा राईको कोरियोग्राफी रहेको छ । गोपाल राय छायाकार हुन् भने मित्र डि गुरुङले सम्पादन गरेका छन् ।
टिजर: