काठमाडौं – नेपाली साङ्गीतिक क्षेत्रका प्रिय गायक र कलाकार प्रकाश सपुतले आफ्नो करियरको अर्को कोसेढुंगा पार गर्दै चलचित्र ‘वसन्त’ मा बहुपक्षीय भूमिका निर्वाह गरेका छन् । सपुतले यस चलचित्रमा निर्माता, निर्देशक, अभिनेता, लेखक, गायक, र सङ्गीतकारको रूपमा योगदान दिएका छन् ।
आइतबार साँझ सार्वजनिक गरिएको पहिलो पोस्टरमा सपुतको गहिरो पात्र प्रस्तुत गरिएको छ । सादगीपूर्ण वातावरणमा लेखनमा व्यस्त देखिएका सपुतले फिल्मको कथा र भावना दर्शकलाई नजिक बनाउने सङ्केत गरेका छन् ।
पोस्टर सार्वजनिक गर्दै सपुतले सामाजिक सञ्जालमा भावुक सन्देश लेख्दै ‘वसन्त’ निर्माणका क्रममा आफूले भोगेका चुनौती र व्यक्तिगत सङ्घर्षलाई उल्लेख गरेका छन् । उनले सामाजिक सञ्जालमा लेखे, “समयले मबाट धेरै कुरा खोसेको छ । तर एक पटक आफ्नै सपनाको यो हद छोएकोमा म दङ्ग छु । मलाई विश्वास छ, ‘वसन्त’ मार्फत समयले खोसिएका सबै कुरा फेरि फिर्ता दिनेछ ।”
सपुतले ‘वसन्त’ लाई आफ्नो जीवनको महत्त्वपूर्ण रङ्गका रूपमा चित्रण गर्दै भनेका छन्, “मैले ‘वसन्त’ मा मभित्रका सबै रङ्ग पोखेको छु । यदि ‘वसन्त’ तपाईँलाई बबाल लाग्यो भने, म बबाल हुँ । यदि लागेन भने पनि मेरो प्रतिभाको दायरा यत्ति नै हो । मैले यहाँभन्दा थप के जान्दिन । यसो भनौँ, म यो जन्मका लागि जम्माजम्मी यत्ति नै हुँ । ‘वसन्त’ जत्ति ।” उनले चलचित्रलाई आफ्नो जीवनको अभिन्न हिस्सा मान्दै लेखन, सिर्जना, गायन, अभिनय, निर्देशन, र निर्माण सबै ‘वसन्त’ कै निरन्तरता हुने बताएका छन् ।
‘वसन्त’ को प्रदर्शन मिति चैत २२ (अप्रिल ४) तोकिएको छ ।
यो पनि पढ्नुहोस्: