देवकोटा र पारिजातको छायामा ‘वसन्त’को पोस्टर

काठमाडौं – नेपाली चलचित्र क्षेत्रका बहुप्रतिभाशाली कलाकार प्रकाश सपुत निर्देशित चलचित्र ‘वसन्त’को प्रचारप्रसार सुरु भएको छ । चलचित्रको प्रदर्शन मिति नजिकिँदै गर्दा पहिलो पोस्टर सार्वजनिक गरिएको छ ।

रोयल भीमसेनले सरल र नेपथ्यीय शैलीमा डिजाइन गरेको यो पोस्टरले नेपाली सांस्कृतिक, साहित्यिक, र भावनात्मक कथाको प्रतिविम्ब झल्काउँछ । पोस्टरले मुख्य पात्र प्रकाश सपुतलाई अध्ययन वा लेखनमा संलग्न देखाउँछ । पृष्ठभूमिमा झुन्डिएका कवि लक्ष्मीप्रसाद देवकोटा र साहित्यकार पारिजातका तस्बिरहरूले चलचित्रका पात्रको साहित्यिक विशेष रुचि भएको सङ्केत गर्छ । पात्रको साधारण पोसाक र परिवेशले ग्रामीण नेपाल वा साधारण जीवन शैलीको प्रतिबिम्ब देखाउँछ ।

आगामी चैत २२ गते रिलिज हुने ‘वसन्त’मा प्रकाश सपुतले निर्माता, निर्देशक, अभिनेता, लेखक, गायक र सङ्गीतकारको बहु आयामिक भूमिका निर्वाह गरेका छन् । उनको यो बहुमुखी प्रतिभाको परिणामस्वरूप चलचित्रलाई दर्शकले कसरी लिन्छन् भन्ने कुरा निकै रोचक हुनेछ ।

यसमा स्वस्तिमा खड्का, खड्गबहादुर पुन, प्रभात पाल, श्री शिभांसी र उर्मिला लाम्गादे जस्ता प्रतिभाशाली कलाकारहरूको अभिनय रहेको छ । चलचित्र गलबन्दी प्रोडक्सनको ब्यानरमा निर्माण भएको हो । मोहन विश्वकर्मा र बिन्दु बोहरा निर्माता हुन् भने अनुरोध भट्टराई, नाना थकाली र वीरेन्द्रनारायण श्रेष्ठ कार्यकारी निर्माता हुन् ।