काठमाडौं – गायक सविन श्रेष्ठले आफ्नो नयाँ गीत ‘बिहानीको किरण…’ सार्वजनिक गरेका छन् । गीतमा सविन आफ्नै शब्द र सङ्गीतमा प्रेम र एकअर्काबीचको साथको सुन्दर भावनालाई उजागर गरेका छन् । धोकाधडीमा रुमलिएको युवायुवतीको प्रेममा विश्वास र भरोसाको अपेक्षाको कुरा गर्दै गीतले निश्चल र स्वच्छ प्रेमको बयान प्रस्तुत गरेको छ ।
सविनका अनुसार, सङ्गीतले उनलाई जीवनको नयाँ अध्याय दिएको छ । उनले भने, “सङ्गीतले मलाई नयाँ जीवन दिएको छ । यो गीत मेरो जीवनको त्यही यात्रा हो, जसले मलाई जिन्दगीलाई फेरि प्रेमिल बनाएको छ ।” गीतमा उनले आफ्नै भोगाइ र कल्पनालाई समेटेका छन् ।
गीतको भिडियोमा जीवन भट्टराई र लक्ष्मी बर्देवाले अभिनय गरेका छन् भने निर्देशन पनि उनीहरूले नै गरेका छन् ।
सविनलाई सवारी दुर्घटनाले सङ्गीतको बाटो हिँड्न प्रेरित गरेको थियो । दुर्घटनापछि उनको जीवनको पहिलो अध्याय समाप्त भएर दोस्रो अध्याय सङ्गीतको रूपमा सुरु भएको हो । उनले भने, “मेरो जीवनको पहिलो २० वर्ष पहिलो अध्यायलाई भएछ । त्यसपछि दोस्रो अध्याय सुरु भयो, जुन सङ्गीत हो ।”
सङ्गीतले सविनको मनमा हराएको रङ्ग फेरि फिर्ता गरिदिएको छ । दुर्घटनाले केही समय खोसेको खुसी फिर्ता भएको छ । उनका काका दिमेश श्रेष्ठका अनुसार, सविनले पहिलो पटक गिटार हातमा लिएर गीत गाएको क्षण उनले कहिल्यै बिर्सन सक्दैनन् ।
भिडियो: