पुलिस थ्रिलर चलचित्र ‘पूजा सर: राजागंज’को पोस्टर सार्वजनिक

काठमाडौं – आगामी चैत १ गते रिलिज हुने तयारीसहित नेपाली चलचित्र ‘पूजा सर: राजागंज’ को पोस्टर सार्वजनिक गरिएको छ । पोस्टरमा कलाकारहरू दयाहाङ राई, आशा मगराती, विजय बराल र निकिता चाण्डक पोस्टरमा छन् । राई प्रहरीको भूमिकामा देखिएका छन् । प्रहरी टोलीसँगै उनी कुनै घटनाका लागि तयार देखिएका छन् ।

यस चलचित्रलाई ‘ह्वाइट सन’ फेम निर्देशक दीपक रौनियारले निर्देशन गरेका हुन् । रौनियारका पछिल्ला फिल्महरूले अन्तर्राष्ट्रिय स्तरमा पनि चर्चा पाएका छन् । ‘ह्वाइट सन’ लाई विश्वविख्यात लेखक पाउलो कोएल्होले प्रशंसा गरेका थिए भने ‘द न्यूयोर्क टाइम्स’ले यसलाई हेर्नुपर्ने ९ नव निर्देशकको सूचीमा समावेश गरेको थियो ।

‘कबड्डी’ सिरिजका निर्देशक रामबाबु गुरुङले निर्माण गरेको यो चलचित्रलाई पुलिस थ्रिलर जनरामा राखिएको छ । चलचित्रमा ऋचा शर्मा, पशुपति राई, गौमाया गुरुङ, घनश्याम मिश्रा, आरती मण्डल र पुष्पा यादव लगायतका कलाकारको पनि अभिनय रहेको छ ।