काठमाडौं – नेपाली हिप-हप क्षेत्रमा नयाँ तरङ्ग ल्याउने उद्देश्यले ‘ब्याटल भूमि’ नामक र्याप ब्याटल शोको घोषणा गरिएको छ । यो शोले नेपाली र्यापरहरूलाई आफ्नो प्रतिभा प्रदर्शन गर्ने एक उत्कृष्ट अवसर प्रदान गर्ने बताइएको छ ।
यसमा सहभागी हुन प्रतियोगीहरूले आफ्नो प्रतिभा डिजिटल माध्यमबाट www.nepalirap.com मा भिडियो अपलोड गरेर वा फिजिकल अडिसनमा सहभागी भएर प्रस्तुत गर्न सक्नेछन् । प्राप्त अडिसनबाट उत्कृष्ट ६४ जना प्रतियोगी छनोट गरिनेछन् । छनोट भएका प्रतियोगीहरूले जज राउन्डमा प्रतिस्पर्धा गर्नेछन् ।
यसका विजेताले नगद रु ५ लाख रुपैयाँका साथै विभिन्न ब्रान्ड इन्डोर्समेन्टका अवसरहरू प्राप्त गर्नेछन् । मानस घले मुख्य निर्णायकको रूपमा रहनेछन् भने विभिन्न एपिसोडमा गेस्ट जजहरू पनि रहनेछन् । ‘नेपहपको श्रीपेच–२’ का विजेता मनिष ढकाल ‘मेक’ले कार्यक्रमको सञ्चालन गर्नेछन् ।
यो शोले नेपाली हिप-हपलाई थप लोकप्रिय बनाउन मद्दत गर्ने विश्वास गरिएको छ ।