काठमाडौं – नेपाली चलचित्र ‘रङ्गी’ जापानमा पनि रिलिज हुने भएको छ । प्राप्त जानकारीअनुसार युएनए इन्टरटेनमेन्टले जापानमा यो चलचित्र वितरण गर्नेछन् । जापानको रिलिज मितिबारे केही खुलाइएको छैन । यो चलचित्र नेपालमा भने फागुन २ गतेदेखि प्रदर्शनमा आउँदैछ ।
अभिनेता सलोन बस्नेतको डेब्यू निर्माण रहेको यो चलचित्र सुरेश न्यौपानेले निर्देशन गरेका हुन् । यसले बाबु छोरीको मार्मिक कथा प्रस्तुत गर्नेछ । जसमा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय रहेको छ । यो चलचित्र पूर्व मिस नेपाल नम्रता श्रेष्ठले अभिनय गरेको पहिलो चलचित्र हो ।
चलचित्रको लेखन सुमन गजमेरले गरेका छन् भने छायाङ्कन सौरभ लामाले गरेका छन् । सङ्गीतमा दुर्गेश थापा, आमेश भण्डारी, र भीम बिसीका सिर्जनाहरू छन् । स्वरमा आनन्द कार्की, समीक्षा अधिकारी, सुजाता केसी, र अन्य चर्चित गायिका-गायकहरूका गीत सामेल छन् ।