काठमाडौं – नेपाली चलचित्र क्षेत्रमा साइन्स फिक्सन श्रेणीको नयाँ अध्याय थप्ने लक्ष्यका साथ निर्माण भइरहेको चलचित्र ‘एक्लो’ले दुई क्यारेक्टर पोस्टर सार्वजनिक गरेको छ । चलचित्रका मुख्य कलाकार जेमी बेकम र कविता नेपालीको आकर्षक क्यारेक्टर पोस्टर सार्वजनिक भएसँगै यसको उत्सुकता बढेको छ ।
लामो समयदेखि बेलायतमा बसेर फिल्म निर्माणको अनुभव बटुलेका निर्देशक प्रदीप शाहीले यस चलचित्रलाई अन्तर्राष्ट्रिय स्तरको बनाउने महत्त्वाकाङ्क्षी लक्ष्य राखेका छन् । हाल चलचित्रको पोस्ट प्रोडक्सनको काम लन्डनमा भइरहेको छ ।
‘एक्लो’ मा प्रदीप खड्का, विजय लामा, सुनिल थापा, दिया पुन, बेनिशा हमाल, दिनेश डिसी जस्ता चर्चित कलाकारहरूको साथमा बेलायती अभिनेता जेमी बेकम र नेपाली नायिका कविता नेपालीको मुख्य भूमिका रहेको छ । यसका साथै सुरज सिङ ठकुरी, त्रिचु राई, कृष्णभक्त महर्जन, विकास अधिकारी, दिग्गज खत्री , विनोदकुमार सुवेदी क्षितिज, श्रीशेष श्रेष्ठ र बाल कलाकार जेमिन श्रेष्ठ र स्योन सविक सिङले पनि चलचित्रमा अभिनय गरेका छन् ।
चलचित्रका निर्माताहरूमा राजु कुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन र कार्यकारी निर्माता विनोद सुवेदी क्षितिज रहेका छन् ।
चलचित्रको सम्पूर्ण काम सकिएपछि मात्र प्रदर्शन मिति तय गरिने निर्देशक शाहीले बताएका छन् ।