काठमाडौं – गायक तथा अभिनेता प्रकाश सपुत निर्देशित चलचित्र ‘बसन्त’को छायाङ्कन सम्पन्न भएको छ । ३८ दिनको मेहनतपछि बुधवार काठमाडौँमा फिल्मको अन्तिम दृश्य खिचेर छायाङ्कन पूरा गरिएको हो ।
आफ्नो पहिलो निर्देशकीय डेब्यु फिल्म ‘बसन्त’ को सफलताको लागि निकै उत्साहित देखिएका सपुतले भने, “म र मेरो टिमले फिल्म निर्माणमा निकै मेहनत गरेका छौँ र हामीलाई लाग्छ कि हामीले जस्तो सोचेका थियौँ, त्यस्तै नतिजा हात पार्नेछौँ ।”
बागलुङ, काठमाडौँ र तराईका विभिन्न स्थानमा छायाङ्कन गरिएको यो चलचित्रले विपन्न विश्वकर्मा समुदायको छोराको लेखक बन्ने सपना र सङ्घर्षको कथा प्रस्तुत गर्नेछ । सपुतले नै फिल्मको कथा, पटकथा र सङ्गीत लेखेका छन् ।
चलचित्रमा प्रकाश सपुत, स्वस्तिमा खड्का, प्रभात पाल ठकुरी, खड्क बहादुर पुन (खबपु), शिवांशी श्री, अनुप बराल, कमलमणि नेपाल, प्रकाश घिमिरेलगायतका कलाकारहरूको अभिनय रहेको छ ।
चलचित्र ‘बसन्त’ आगामी चैत २२ गते चैते दसैँको अवसर पारेर प्रदर्शन हुने बताइएको छ ।