काठमाडौं – आगामी फागुन २ गते प्रदर्शनका लागि अर्को नयाँ नेपाली चलचित्र थपिएको छ । यो मितिमा चलचित्र ‘रङ्गी’ रिलिजको घोषणा गरिएको छ । यसअघि फागुन २ गतेका लागि ‘दुखी आत्मा’ चलचित्र रिलिज हुने घोषणा भइसकेको थियो ।
सान्भी इन्टरटेनमेन्ट प्रालिको ब्यानरमा निर्माण भएको चलचित्र ‘रङ्गी’ले दर्शकलाई बाबु छोरीको मार्मिक कथा प्रस्तुत गर्नेछ ।सलोन बस्नेत प्रस्तुत कर्ता रहेको यस चलचित्रको रिलिज मिति घोषणा गर्दै निर्माण टिमले बुधवार पोस्टर र मोसन पोस्टर सार्वजनिक गरेको हो । ग्रामीण परिवेशलाई पृष्ठभूमिमा उभ्याइएको फिल्ममा सलोन बस्नेत, नम्रता श्रेष्ठ, दिलीप रायमाझी, बाल कलाकार आयुषी ढकाललगायतका कलाकारको अभिनय रहेको छ ।
यस चलचित्रलाई सुरेश न्यौपानेले निर्देशन गर्दै छन् । ‘छक्का पन्जा’, ‘ए मेरो हजुर २’ जस्ता सफल चलचित्रमा सहायक निर्देशकको रूपमा काम गरिसकेका उनको यो नै पहिलो निर्देशकीय चलचित्र हो ।‘मिस वर्ल्ड नेपाल २०२०’ की विजेता नम्रता श्रेष्ठले यस चलचित्रबाट नेपाली चलचित्रमा डेब्यू गरेकी छिन् ।
चलचित्रको लेखन सुमन गजमेरले गरेका हुन् । सौरभ लामा फिल्मका छायाकार हुन् । दुर्गेश थापा, आमेश भण्डारी र भीम बिसीले फिल्मको सङ्गीत दिएका छन् ।