काठमाडौं – दीपेन्द्र लामाको लेखन र निर्देशनमा बनेको नेपाली चलचित्र ‘दुखी आत्मा’को तीन पोस्टर सार्वजनिक भएका छन् । सोमबार सार्वजनिक भएका विभिन्न तीन डिजाइनका पोस्टरले चलचित्रको रोमाञ्चक कथाको झलक दिएको छ । पोस्टर डिजाइन विजय बस्यालले गरेका हुन् ।
पहिलो पोस्टरमा दयाहाङ राई एक्लै देखिएका छन् भने दोस्रो पोस्टरमा उनी आँचल शर्मासँग प्रेमिल अवस्थामा देखिएका छन् । तेस्रो पोस्टरमा भने दयाहाङ, आँचलसँगै अनुपविक्रम शाही, बुद्धि तामाङ, रेअर राई, लोकेन्द्र लेखक र आशान्त शर्मा पनि देखिएका छन् । यी कलाकारहरूको उपस्थितिले चलचित्रमा थप रोमाञ्चकता थपेको छ ।
फागुन २ गते रिलिज हुने यस चलचित्रमा चर्चित कवि श्रवण मुकारुङका दस वटा पेचिला कविता समावेश गरिएको छ । आलोक शुक्लाले खिचेको यस चलचित्रलाई निमेष श्रेष्ठले सम्पादन गरेका हुन् भने आरआर फिल्मस्ले वितरण गर्दैछ ।
क्लक वर्क कृएसनको ब्यानरमा हिमाल कडरियाले निर्माण गरेको यो चलचित्रमा सुदिप ढकाल कार्यकारी निर्माता छन् ।