काठमाडौं – पूर्ण रूपमा स्मार्टफोनबाट छायाङ्कन गरिएको नेपाली चलचित्र ‘अ प्लेस अन्डर द सन’ नेपाली ओटीटी प्लेटफर्म ‘एमएसएम भिडियो’मा रिलिज भएको छ । यसअघि अमेरिका र क्यानडामा अमेजन प्राइम भिडियोमा रिलिज भइसकेको यो चलचित्रलाई नेपालसहित अन्य मुलुकमा रहेका नेपाली दर्शक लक्षित गरी एमएसएममा रिलिज गरिएको हो ।
चलचित्र रिलिज भए लगत्तै दर्शकहरूबाट सकारात्मक प्रतिक्रिया आइरहेको निर्देशक जेसन लोप्चनले बताए । धेरैले यसलाई नेपाली चलचित्र उद्योगमा एउटा नयाँ आयाम भएको बताएको र यसको कथावस्तु, कलाकारको अभिनय र खिचाइले दर्शकको ध्यान खिचेको निर्देशकले जनाए ।
यो चलचित्र स्मार्टफोनबाट खिचिएको भए तापनि यसको सिनेमाटोग्राफीको गुणस्तर भने सन्तोषजनक नै छ । यो चलचित्र सानो लगानीमा बनेको भए पनि यसले नेपाली चलचित्र क्षेत्रमा नयाँ प्राविधिक प्रयोगको उदाहरण प्रस्तुत गरेको छ ।
वन स्क्वाड फिल्मस्ले निर्माण गरेको यस चलचित्रमा मिन घलान, मिरा गुरुङ, अंशु शर्मा, विप्लव गौली, प्रजन पौडेल, प्रवेश एमसी, रिडेन श्रेष्ठ, सन्तोष मिजार लगायतको अभिनय रहेको छ । यसको लेखन र सम्पादन निर्देशक लोप्चनले नै गरेका छन् । सह-निर्माता उमेश खड्का, डिओपी प्रवीण लिम्बु हुन् भने सङ्गीतकारहरू राजीव थापा, गणेश जङ्ग रावल र प्रज्वल खड्का हुन् ।