काठमाडौं – भारतको टेलिभिजन च्यानल एमटीभीको लोकप्रिय रियालिटी शो ‘स्प्लिट्सभिल्ला’बाट चर्चा कमाएकी दिकिला शेर्पाले नेपाली चलचित्रमा डेब्यु गर्ने भएकी छन् । रोहित अधिकारीद्वारा निर्माण हुने ‘माइतीघर’मा उनी अनुबन्धित भएको खबर छ ।
दिकिला भारतको सिक्कीमकी स्थायी बासिन्दा हुन् । भारतस्थित नेपाली समुदाय र नेपाली युवाहरूमाझ लोकप्रिय दिकिलाको अभिनय यसअघि एकदेव लिम्बुको गीत ‘झिम झिमाउने आँखा’मा देखिएको थियो । गत साता रिलिज भएको यो गीत युट्युबमा सङ्गीततर्फ नम्बर १ ट्रेन्डिङमा रहेको छ ।
‘माइतीघर’मा यसअघि केदार घिमिरे, उपासनासिंह ठकुरी, बुद्धि तामाङ, प्रकाश सपुतलगायत कलाकारहरू अनुबन्धित भइसकेका छन् । मिलन तामाङले निर्देशन गर्ने यो चलचित्रको छायाङ्कन चाँडै सुरु हुने बताइएको छ ।