दक्षिण भारतीय चलचित्र क्षेत्रकी चर्चित अभिनेत्री कीर्ति सुरेशले आफ्नो प्रेमी एन्टोनी थाटिलसँग विवाह गर्ने भएकी छिन् । लामो समयदेखि प्रेम सम्बन्धमा रहेको यो जोडीले आगामी महिना विवाह बन्धनमा बाँधिन लागेको हो ।
कीर्ति सुरेश र एन्टोनी थाटिलले १५ वर्षदेखि प्रेम सम्बन्धमा थिए । केही समयअघि मात्र उनीहरूले आफ्नो सम्बन्धलाई सार्वजनिक गरेका थिए । कीर्तिले सामाजिक सञ्जालमा एन्टोनीसँगको तस्बिर साझेदारी गर्दै लेखेकी थिइन्, “१५ वर्ष भयो र यो यात्रा अझै जारी छ ।”
हालैमात्रै कीर्ति सुरेश तिरुपति मन्दिर पुगेकी थिइन् । उनले भगवान वेंकटेशको दर्शन गरेकी थिइन् र आफ्नो आगामी विवाहको बारेमा पनि जानकारी दिइन् । उनले भनिन्, “म आफ्नो नयाँ चलचित्र ‘बेबी जोन’को प्रचारका लागि यहाँ आएकी हुँ । साथै, म अर्को महिना विवाह गर्दैछु, त्यसैले भगवानको आशीर्वाद लिन आएकी हुँ ।”
कीर्ति र एन्टोनीको विवाह गोवामा हुनेछ । यो एक निजी समारोह हुनेछ । कीर्ति सुरेशका प्रेमी एन्टोनी थाटिल केरलाका एक चर्चित व्यवसायी हुन् । उनी केरलाको एक प्रसिद्ध रिसोर्ट चेनका मालिक हुन् ।
कीर्ति सुरेशले चाँडै नै बलिउडमा डेब्यु गर्न लागेकी छिन् । उनको वरुण धवनसँगको चलचित्र ‘बेबी जोन’ २५ डिसेम्बरमा रिलिज हुँदैछ ।