काठमाडौं – सान्भी इन्टरटेनमेन्ट प्रालिको ब्यानरमा निर्माण भइरहेको चलचित्र ‘रङ्गी’ को छायाङ्कन सम्पन्न भएको छ । सलोन बस्नेत प्रस्तुतकर्ता रहेको यस चलचित्रको छायाङ्कन निर्धारित ३० दिनको अवधिलाई छोट्टाउँदै २६ दिनमै पूरा भएको हो ।
सुरेश न्यौपानेको निर्देशनमा बनेको यस चलचित्रमा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ र विशाल पहारीलगायतका कलाकारहरूको अभिनय रहेको छ । न्यौपानेसँग ‘छक्का पन्जा’, ‘ए मेरो हजुर २’, ‘यात्रा’ जस्ता चर्चित चलचित्रहरूमा सहायक निर्देशकको अनुभव छ ।
चलचित्रका अन्य प्राविधिक पक्षमा सक्षम सुवेदी निर्माता, सुमन गजमेर लेखक, सौरभ लामा छायाङ्कन निर्देशक, दुर्गेश थापा, आमेश भण्डारी र भीम बिसी सङ्गीतकार, कविराज गहतराज र शिशिर खाती कोरियोग्राफर तथा केवलमान सिंह बस्नेत प्रोडक्सन डिजाइनर रहेका छन् ।
निर्धारित समयभन्दा अगाडि नै छायाङ्कन पूरा भएसँगै चलचित्र निर्माण टोली उत्साहित छ। अब चलचित्रको पोस्ट प्रोडक्सनको काम सुरु हुनेछ ।