काठमाडौं – बुटवलको अमरपथमा रहेको सिंह कम्प्लेक्समा शुक्रवारबाट नयाँ मल्टिप्लेक्स हल फ्रेन्डस् सिनेमाज् औपचारिक रूपमा सञ्चालनमा आएको छ। २२२ सिट क्षमताको यो हल रोयल सिने हब प्रा.लि. द्वारा धरानको चर्चित फ्रेन्डस् सिनेमाज् को फ्रेन्चाइजका रूपमा स्थापना गरिएको हो ।
चलचित्र वितरक र व्यवसायी आशिष तामाङ, प्रदीप धामी, र पुष्कर घिमिरेको नेतृत्वमा बुटवलमा स्थापना गरिएको यो हल आधुनिक प्रविधि र दर्शकका लागि विभिन्न सेवा सुविधासहित निर्माण गरिएको बताइएको छ । सञ्चालक आशिष तामाङका अनुसार, हल उद्घाटनको अवसरमा पहिलो साताभरि टिकट दर रु. १५० मा राखिएको छ । त्यस्तै, बिहानी शो तथा मङ्गलवार र बुधवारका शोका लागि थप सहुलियत प्रदान गरिनेछ ।
फ्रेन्डस् सिनेमाजले दैनिक ६ शोसम्म सञ्चालन गर्न सक्ने सुविधा प्रदान गरेको छ भने हलले नेपाली फिल्मलाई प्राथमिकतामा राख्दै प्रदर्शन गर्ने जनाएको छ ।