भारतीय चलचित्रका ‘रूमर्ड कपल’ अभिनेत्री रश्मिका मन्दाना र अभिनेता विजय देवरकोन्डालाई हालै एकसाथ ‘लन्च डेट’मा देखिएको छ । दुवैको तस्बिरहरू सामाजिक सञ्जालमा छाएका छन् । भारतीय मिडियामा प्रकाशित समाचारहरूमा ती तस्बिरहरू राखिएको छ, जहाँ विजय टेबलमा खाना खाइरहेको देखिन्छ भने रश्मिका उनको सामुन्ने, क्यामेरातर्फ पछाडि फर्केर बसेकी छिन् । अर्को तस्बिरमा रश्मिका आफ्नो खाना ‘इन्जोय’ गरिरहेकी देखिन्छिन् ।
लन्च डेटमा दुवैले मिल्दोजुल्दो पहिरनमा देखिएका छन् । रश्मिका स्लीभलेस क्रप ब्लु टप र ब्लु डेनिममा थिइन् भने विजयले निलो ज्याकेट लगाएका थिए ।
विजय र रश्मिकाबीचको रिलेसनशिपको चर्चा लामो समयदेखि चल्दै आएको छ । हालै विजयले एक अन्तर्वार्तामा आफ्नो व्यक्तिगत जीवनबारे बोलेका थिए । उनले भनेका थिए, “म सिङ्गल छैन, प्रेम के हो भन्ने कुरा म जान्दछु । मैले पहिले पनि एक को-स्टारलाई डेट गरेको छु । ३५ वर्षको उमेरमा सिङ्गल रहनु असम्भव छ । हरेकले विवाह गर्नु नै पर्छ ।”
रश्मिकाले पनि आफ्नो खराब समयमा विजयको साथ पाएको बताएकी थिइन् । उनले भनेकी थिइन्, “ब्रेकअपपछि विजयले मलाई धेरै सहयोग गरे । उनले मलाई हेरचाह गरे र मेरो भावनालाई बुझे ।”
रश्मिका र विजयले २०१८ मा आएको चलचित्र ‘गीता गोविन्दम’मा पहिलो पटक सँगै काम गरेका थिए । त्यसपछि उनीहरूको जोडीलाई चलचित्र ‘डियर कमरेड’मा पनि मन पराइएको थियो । यी चलचित्रहरूको छायाङ्कनको क्रममा नै उनीहरू ‘डेट’ गरिरहेको हल्ला चलेको थियो ।
रश्मिकाले आफ्नो पहिलो चलचित्र ‘किरिक पार्टी’का अभिनेता रक्षित सेट्टीलाई डेट गरेकी थिइन् । उनीहरूले २०१७ मा ‘इन्गेजमेन्ट’ गरेका थिए, तर २०१८ मा उनीहरूको इन्गेजमेन्ट टुट्यो । ब्रेकअपपछि रश्मिकालाई सामाजिक सञ्जालमा ट्रोल गरिएको थियो ।
रक्षितले यसबारे प्रतिक्रिया दिँदै भनेका थिए, “रश्मिकाबारे गलत धारणा बनाउन बन्द गर्नुहोस् । मैले उनलाई दुई वर्षदेखि चिनेको छु, कृपया उनलाई जज नगर्नुहोस् ।”
हालसम्म विजय र रश्मिकाको सगाई वा विवाहबारे कुनै औपचारिक पुष्टि भएको छैन, तर उनीहरूको रिलेसनशिपको चर्चा निरन्तर जारी छ ।
आगामी डिसेम्बर ५ मा रश्मिका अभिनीत चलचित्र ‘पुष्पा २’ रिलिज हुँदैछ ।