एजेन्सी – भारतका आइकन स्टार अल्लु अर्जुनको आगामी चलचित्र ‘पुष्पा २: द रुल’ को ट्रेलर सार्वजनिक भएको केही समयमै यसले ठूलो चर्चा पाएको छ । यस ट्रेलरलाई दर्शकहरूले धेरै रुचाइरहेका छन् भने यसको एक रहस्यमयी पात्रले सबैको ध्यान तानेको छ ।
ट्रेलरको लगभग मध्य भागमा यो पात्रको झलक देखिन्छ । यो झलक एक पलमै हराउँछ, तर छोटो समयमै यो पात्र दर्शकको दिमागमा बसेर जान्छ । यो पात्रलाई आधा खौरिएको टाउको, घाँटीमा चप्पलहरूको माला, निधारमा ठूलो रातो टीका, ओठको छेउमा दाँतजस्तो चित्रण, र अनौठो मेकअपका साथ देखाइएको छ । यसको रूप निकै भयानक देखिन्छ ।
‘पुष्पा २’ ट्रेलरमा देखिएको यो पात्र तेलुगु अभिनेता श्रीतेजले निभाएका हुन् । यस पात्रको नाम ‘मोलेटी धर्मराज’ हो । यस पात्रलाई पुष्पा राजका कान्छा सौतेनी भाइको रूपमा देखाइएको छ । ट्रेलरमा देखाइएको यो भयानक रूप, फिल्मको ‘गंगाम्मा जतारा’ नामक धार्मिक यात्राको दृश्यसँग जोडिएको छ । यस दृश्यमा अल्लु अर्जुन पनि अनौठो अवतारमा प्रस्तुत हुनेछन्, जुन पहिले नै पोस्टरमार्फत सार्वजनिक गरिएको थियो ।
गंगाम्मा जतारा आन्ध्र प्रदेशको तिरुपति सहरकी ग्रामदेवी गंगाम्माको एक राक्षसमाथिको विजयको प्रतीक मानिन्छ । श्रीतेजको यो राक्षसी अवतारले ट्रेलरलाई थप रोमाञ्चक बनाएको छ । यस दृश्यले सङ्केत दिन सक्छ कि यो पात्रले पुष्पा राजकी पत्नी श्रीवल्ली (रश्मिका मन्दाना)सँग केही नराम्रो गर्न सक्नेछ । ट्रेलरपछि दर्शकहरूमा श्रीवल्लीको मृत्युको अफवाह पनि चल्न थालेको छ । धेरैले अनुमान गरिरहेका छन् कि धर्मराज र श्रीवल्लीबीचको सम्बन्ध फिल्मको कथा मोड्नेछ ।
श्रीतेजले २०१३ मा अभिनय यात्रा सुरु गरेका थिए । उनले पर्दामा आन्ध्र प्रदेशका दुई मुख्यमन्त्रीहरू, वाईएस राजशेखर रेड्डी र एन चन्द्रबाबु नायडुको भूमिकासमेत निभाइसकेका छन् । उनी तेलुगु सिनेमाका युवा प्रतिभाशाली अभिनेतामध्ये एक हुन् ।
‘पुष्पा २’ ५ डिसेम्बरमा विश्वव्यापी रिलिज हुँदैछ ।