‘सत्यबिर’मा प्रकाश शाह

काठमाडौं – अभिनेता प्रकाश शाह निर्देशक बिराज खड्काले निर्देशन गर्ने नेपाली चलचित्र ‘सत्यबिर’को एक प्रमुख भूमिकामा अनुबन्धित भएका छन् । हालै सार्वजनिक गरिएको एक पोस्टरमा शाहलाई एक ‘एङ्ग्री’ लुक्समा सिगार पिउँदै देखाइएको छ । पृष्ठभूमिमा देखिएका जङ्गल, हात्तीको बङ्गारा, र सूँडले यो चलचित्र क्राइम थ्रिलर जनरामा बन्ने सङ्केत गरेको छ ।

यसअघि यस चलचित्रमा अभिनेता प्रदीप चौधरी प्रमुख भूमिकाको लागि अनुबन्ध भएका थिए । चौधरीलाई पनि एक्सन लुक्समा सार्वजनिक गरिएको थियो । चौधरी र शाहको भूमिकाबारे विस्तृत जानकारी भने अहिलेसम्म सार्वजनिक गरिएको छैन ।

‘सत्यबिर’ गडरेज पिक्चर्स प्रा.लि.को निर्माणमा तयार हुँदैछ, जसका निर्माता आदेश सुब्बा हुन् । यसको निर्माण लागत करिब साढे दुई करोड रुपैयाँ छ, जसमा ४० प्रतिशत दृश्य अत्याधुनिक भिएफएक्स प्रविधिबाट तयार गरिनेछ । छायाङ्कन काठमाडौं, चितवन, र तराईका विभिन्न स्थानहरूमा गरिने तयारी छ । यसको कथा प्रदीप चौधरीले लेखेका हुन् ।

निर्देशक बिराज खड्काका लागि यो निर्देशनमा डेब्यु प्रोजेक्ट हो । खड्का यसअघि ‘प्रेम गीत ३’, ‘बाबरी’, र ‘काँडेतार’जस्ता फिल्महरूमा भिएफएक्स सुपरभाइजरको रूपमा आफ्नो दक्षता प्रमाणित गरिसकेका छन् ।