काठमाडौं – लोकप्रिय टिभी कार्यक्रम ‘कमेडी नाइट विथ च्याम्पियन’ को औपचारिक घोषणा सोमबार एक विशेष पत्रकार सम्मेलनमार्फत गरिएको छ । अघिल्लो सिजनको ‘कमेडी क्लब विथ च्याम्पियन’ लाई नयाँ नाम र स्वरूपका साथ प्रस्तुत गर्दै यो शो थप मनोरञ्जन र गुणस्तरका साथ दर्शकमाझ आउने दाबी गरिएको छ ।
शोको निर्देशन र होस्टको भूमिका विशाल भण्डारीले निभाउनेछन् । निर्माणतर्फ सगुन पाण्डे र हिरण बस्नेत संलग्न छन् । कार्यक्रमको अध्यक्षका रूपमा चर्चित हास्य कलाकार दीपाश्री निरौलाले नेतृत्व गर्नेछिन् ।
उक्त शोमा प्रभात लामा, भरतमणि पौडेल, कैलाश कार्की, सन्तोष थापा, पवन भट्टराई, सजन श्रेष्ठ, सुमन कार्की, मेक्सम गौडेल, र सुमन कोइरालाजस्ता प्रतिभाशाली कलाकारहरूले आफ्नो हास्य प्रस्तुति दिनेछन् ।
यो सिजनमा अन्तर्राष्ट्रिय स्तरको स्टुडियो सेट अप निर्माण गरिएको बताइएको छ । हिमालय टिभीसँग सहकार्य गर्दै ठूलो बजेटमा तयार गरिएको यस शोले दर्शकहरूलाई उच्चस्तरीय अनुभव दिनेछ । कार्यक्रममा हास्य प्रस्तुति, अतिथिसँग अन्तरक्रिया, र स्टेज व्यङ्ग्य मुख्य आकर्षण रहनेछन् ।
डेढ घण्टाको यो शो ५२ एपिसोडसम्म प्रसारण हुनेछ । कार्यक्रम हिमालय टिभीमा प्रसारण गरिनुका साथै ओएसआर रियालिटी च्यानलमार्फत युट्युबमा पनि स्ट्रिमिङ गरिनेछ । शोका लेखकहरूमा सन्तोष खनाल, सन्देश देवकोटा, र रजनीश अर्याल छन् ।
यो कार्यक्रम चाँडै हिमालय टिभी र ओएसआर रियालिटी च्यानलमा हेर्न सकिनेछ ।