काठमाडौं – एक्सन र लभस्टोरीमा आधारित नेपाली चलचित्र ‘सत्या’ को ट्रेलर सार्वजनिक गरिएको छ । आइतबार सामाखुसीस्थित सिटी स्क्वायर मलको क्युएफएक्स सिनेमामा आयोजित विशेष कार्यक्रममार्फत चलचित्रको साढे दुई मिनेट लामो ट्रेलर प्रदर्शन गरिएको हो ।
मङ्सिर १४ गते प्रदर्शनमा आउन लागेको मिलन आले मगरको निर्देशनमा बनेको यो चलचित्र लाई एक्सन दृश्यहरूमा विशेष जोड दिइएको ट्रेलरबाट प्रस्ट हुन्छ । चलचित्रमा राज कालाखेती, प्रिया शर्मा, करणसिंह बोहरा, विकास थापा मगर, वर्षा थिङ, सुमन खत्री, तेजा ऐर र ममता पौडेल लगायतका कलाकारले अभिनय गरेका छन् । स्क्रिप्ट श्रवण सम्राट्ले लेखेका हुन् भने छायाङ्कन सुमनकुमार तण्डुकारले गरेका छन् ।
चलचित्रका गीतहरूमा विकास चौधरीको सङ्गीत रहेको छ भने नृत्य निर्देशन रामजी लामिछाने, सुरेश पाण्डे र सुरेन बसेलले गरेका छन् । सम्पादन तारा थापा ‘किम्भे’ले गरेका छन् ।
ट्रेलर सार्वजनिक कार्यक्रममा निर्देशक आले मगरले चलचित्र निर्माण केही समयअघि नै सम्पन्न भए तापनि यसको कथावस्तु अहिले पनि समयसापेक्ष रहेको बताए । प्रस्तुत कर्ता तथा अभिनेता विकास थापा मगरले चलचित्रका केही कलाकार र निर्माता विदेशमा भएकाले प्रदर्शन ढिला भएको उल्लेख गर्दै, चलचित्रले दर्शकलाई भरपुर मनोरञ्जन दिने विश्वास व्यक्त गरे ।
ट्रेलर: