काठमाडौं – दीपेन्द्र लामा निर्देशित चलचित्र ‘दुखी आत्मा’को प्रदर्शन मिति सार्वजनिक गरिएको छ । यो चलचित्र आगामी फागुन २ गते, भ्यालेन्टाइन डेको अवसरमा प्रदर्शनमा आउने भएको छ । निर्माण ब्यानर क्लक वर्क क्रिएशन्स ले शुक्रवार टाइटल डिजाइन सार्वजनिक गर्दै प्रदर्शन मिति घोषणा गरेको हो ।
यो मितिमा अनमोल केसी, जसिता गुरुङ, आँचल शर्मा, केदार घिमिरे, बिपना थापा, निर्मल शर्मा, सुरक्षा पन्त लगायतको अभिनय रहेको चलचित्र ‘जेरी अन टप’को प्रदर्शन मिति पनि तय भएको छ । यस चलचित्रको छायाङ्कन हालै सुरु भएको छ ।
‘दुखी आत्मा’मा दयाहाङ राई, आँचल शर्मा, अनुप विक्रम शाही, बुद्धि तामाङ, र रेअर राई लगायतका कलाकारले अभिनय गरेका छन् । यसका निर्माता हिमाल कडरिया हुन् । यसअघि निर्देशक दीपेन्द्र लामा र निर्माता हिमाल कडरियाको सहकार्यमा निर्माण भएको ‘नाङ्गो गाउँ’ सुपर हिट भएको थियो ।
यसको छायाङ्कन काठमाडौंको सेरोफेरोमा गरिएको हो ।